ԱՄՆ-ը դատապարտել է «Լուկաշենկոյի ռեժիմի խորհրդարանական և ՏԻՄ կեղծ ընտրությունները»

ԱՄՆ-ը դատապարտել է Բելառուսում կիրակի՝ փետրվարի 25-ին անցկացված խորհրդարանական և տեղական ինքնակառավարման մարմինների ընտրությունները։

«Միացյալ Նահանգները դատապարտում է Լուկաշենկոյի ռեժիմի խորհրդարանական և տեղական կեղծ ընտրությունները, որոնք ավարտվեցին Բելառուսում։ Ընտրություններն անցել են վախի մթնոլորտում, որի պայմաններում ոչ մի ընտրական գործընթաց չի կարելի անվանել ժողովրդավարական։ Վարչախումբը շարունակում է անազատության մեջ պահել ավելի քան 1400 քաղբանտարկյալների։ Բոլոր անկախ քաղաքական գործիչները կա՛մ կալանավորվել են, կա՛մ աքսորվել։ Բոլոր անկախ քաղաքական կուսակցությունների գրանցումը մերժվել է։ Արտերկրում գտնվող բելառուսները կարող էին քվեարկել միայն այն դեպքում, եթե վերադառնային Մինսկ, որտեղ նրանք, հավանաբար, կբախվեին հաշվեհարդարի»,-ա սվում է Պետքարտուղարության տարածած հաղորդագրության մեջ։

Նշվում է, որ «այս չարաշահումները փաստացի սառեցրել են իրական քաղաքական գործունեությունն ու դիսկուրսը Բելառուսի ներսում: Ռեժիմը կանխել է ԵԱՀԿ դիտորդական առաքելության դիտարկումը՝ ավելի սահմանափակելով թափանցիկությունը, որն էական է ազատ ու թափանցիկ ընտրությունների համար։

«ԱՄՆ-ը ճանաչում է Բելառուսի քաղաքացիական հասարակության և ժողովրդավարության շարժման ուժը, ճկունությունը և քաջությունը, որը պահանջում է ձայն ունենալ իր երկրի ապագան որոշելու հարցում: Միացյալ Նահանգները ևս մեկ անգամ կոչ է անում Լուկաշենկոյի ռեժիմին՝ դադարեցնել բռնաճնշումները, ազատ արձակել բոլոր քաղբանտարկյալներին և սկսել երկխոսություն քաղաքական հակառակորդների հետ։ Բելառուսի ժողովուրդն ավելի լավին է արժանի»,- ասվում է հայտարարության մեջ։

Նշենք, որ Բելառուսի խորհրդարանական ընտրություններին մասնակցում էր 4 կուսակցություն՝ «Բելայա ռուս»-ը, որը ստեղծվել է 2023 թվականին և աջակցում է նախագահ Ալեքսանդր Լուկաշենկոյին, Կոմունիստական կուսակցությունը, Լուկաշենկոյին աջակցող Աշխատանքի և արդարության հանրապետական կուսակցությունը և Լիբերալ-դեմոկրատական ​​կուսակցությունը, որն իրեն անվանում է «կառուցողական ընդդիմադիր» շարժում։