16.12.2025 | 16:21
Մենք կձեռնարկենք որոշ խորհրդանշական քայլեր՝ սկսած հաջորդ տարվա սկզբից․ Էրդողանը՝ ՀՀ-ի հետ հարաբերությունների մասին
Իլհամ Ալիևը առայժմ Վաշինգտոնից շնորհավորանք չի ստացել
Քաղաքականություն
16.02.2024 | 13:15
Ադրբեջանում փետրվարի 7-ին տեղի ունեցած արտահերթ նախագահական ընտրություններից ու Իլհամ Ալիևի վերընտրությունից ավելի քան մեկ շաբաթ է անցել, սակայն Ալիևը ԱՄՆ-ից այդպես է շնորհավորանք չի ստացել։
Ընտրություններից հետո Բաքվում ԱՄՆ դեսպանատունը հայտարարություն էր տարածել՝ նշելով, որ Միացյալ Նահանգները կիսում է ԵԱՀԿ/ԺՀՄԻԳ դիտորդական առաքելության դիտարկումներն ու մտահոգություններն առ այն, որ փետրվարի 7-ի նախագահական ընտրությունները տեղի են ունեցել սահմանափակ միջավայրում՝ իրական մրցակցության բացակայությամբ:
«Ադրբեջանն իր հավատարմությունն է հայտնել հիմնարար ազատություններին և ժողովրդավարական գործընթացներին իր սահմանադրությամբ և միջազգային պարտավորություններով»,- ասվում է հայտարարության մեջ։ ԱՄՆ-ն Բաքվին կոչ էր արել կատարել այս պարտավորությունները և ԺՀՄԻԳ-ի նախորդ ու առաջիկա հանձնարարականները։ Ուշագրավ է, որ նման գնահատականները չէին խանգարել Գերմանիայի կանցլերին, Մեծ Բրիտանիայի վարչապետին ու Եվրոպական խորհրդի նախագահին շնորհավորել Ալիևին, այնինչ ԱՄՆ-ն շարունակում է լուռ մնալ։
Այս հարցին նախօրեին անդրադարձել է Բաքվում ԱՄՆ դեսպան Մարկ Լիբբին լրագրողների հետ զրույցում։ Մասնավորապես, լրագրողները հետաքրքրվել են, թե ինչո՞ւ շնորհավորանք այդպես էլ չի ստացվում և արդյոք կան կասկածներ ընտրությունների լեգիտիմության մասով։ Դեսպանը նշել է, որ ԵԱՀԿ-ի պատրաստած զեկույցում կոնկրետ մտահոգություններ են արտահայտվել ընտրությունների անցկացման և նախընտրական իրավիճակի վերաբերյալ. «Մենք նույնպես հետևել ենք այդ գործընթացներին։ Սուտ կլինի, եթե ասենք, որ մենք դրանք չենք տեսել: Դրա համար մենք ասացինք, որ համաձայն ենք ԵԱՀԿ նախնական զեկույցի հետ»,-ասել է Լիբբին՝ հավելելով․
«Մենք չպետք է ասենք լեգիտիմություն կա, թե՝ ոչ։ Այդ հարցը պետք է տալ Ադրբեջանի ժողովրդին։ Մենք մատնացույց ենք անում, թե ինչպես անցկացնել մրցակցային ընտրություններ և այլ խնդիրները։ Դրանք ուղղելը մեր խնդիրը չէ։ Ինչ պետք է անել հիմա՝ բարելավել հարաբերությունները նախագահի նոր մանդատի ժամակահատվածում»։
Հավելենք, որ ԵԱՀԿ/ԺՀՄԻԳ դիտորդական առաքելության ներկայացուցիչները նախնական դիտարկումներով՝ արտահերթ նախագահական ընտրություններն անցել են սահմանափակ միջավայրում, և թեև ընտրությունների նախապատրաստական աշխատանքներն արդյունավետ կառավարվել են, սակայն դրանք աչքի են ընկել քաղաքական այլընտրանքների, մրցակցության բացակայությամբ և լրջագույն ընտրախախտումներով։
Ըստ Ադրբեջանի ԿԸՀ տվյալների՝ Իլհամ Ալիևն հաղթել է ընտրություններում հավաքելով ձայների 92,12 տոկոսը։
Էմմա Չոբանյան
