«Այդպես ավելի լավ է բոլորի համար». Պապուաշվիլին՝ Վրաստանի խորհրդարանի առաջին նիստին ԱՄՆ-ի ու ԵՄ երկրների դեսպանների բացակայության մասին

Վրաստանի խորհրդարանի խոսնակ Շալվա Պապուաշվիլին նոր խորհրդարանի առաջին հանդիպմանը օտարերկրյա դեսպանների բացակայությունը բացատրել է որպես «վրացական քաղաքականության մեջ օտարերկրյա մասնակցության գործիքավորման անհաջող փորձ», փոխանցում է Newsgeorgia-ն:

«Այսօր Վրաստանի քաղաքացիների կողմից ընտրված խորհրդարանի առաջին նիստն է։ Այս օրն առաջին հերթին մեր քաղաքացիների, նրանց ընտրած խորհրդարանի համար է։ Կառավարությունը, սահմանադրական մարմինները, ուղղափառ եկեղեցու ներկայացուցիչները ներկա կլինեն խորհրդարանում, և այս օրը կդառնա մեր ազգային տոնը, ինչպես վայել է մեր երկրին»,- հանդիպման մեկնարկից առաջ լրագրողներին ասել է Պապուաշվիլին:

Անդրադառնալով խորհրդարանի անդրանիկ նիստին ԱՄՆ-ի ու ԵՄ անդամ երկրների դեսպանների մասնակցությանը՝ Պապուաշվիլին ասել է․ «Ինչ վերաբերում է արտասահմանյան երկրների ներկայացուցիչների մասնակցելուն կամ չմասնակցելուն, ապա մենք ունենք վրացական քաղաքականության մեջ օտարերկրյա մասնակցության անհաջող փորձ։ Կարծում եմ՝ սա ավելի լավ է բոլորի համար, որ Վրաստանի ներքին գործերին անտեղի միջամտություն չլինի։ Կարծում եմ՝ կարևոր է, որ խորհրդարանն ամբողջությամբ ունենա այս մոտեցումը»։

Այսօր Թբիլիսիում մեկնարկել է Վրաստանի 11-րդ գումարման խորհրդարանի նիստը, որի լեգիտիմությունը չեն ճանաչում ընդդիմությունն ու նախագահը։ Սալոմե Զուրաբիշվիլին և չորս ընդդիմադիր կուսակցություններ, որոնք հաղթահարել են ընտրական շեմը, պնդում են, որ հոկտեմբերի 26-ին անցկացված խորհրդարանական ընտրությունների արդյունքները կեղծվել են։

Հանդիպմանը մասնակցում են միայն իշխող «Վրացական երազանք» կուսակցության պատգամավորները, որոնք, ըստ ԿԸՀ-ի, հոկտեմբերի 26-ի ընտրություններում հավաքել են ձայների մոտ 54%-ը և օրենսդիր մարմնի 150 մանդատներից 89-ը։

Թարգմանությունը՝ Տաթև Ֆռանգյանի