ԱՄՆ Կոնգրեսում հայտարարվել է ԱՄՆ-ի «անվտանգությանը լուրջ սպառնալիքի» մասին

ԱՄՆ Կոնգրեսի Ներկայացուցիչների պալատի հետախուզության հանձնաժողովի նախագահ, հանրապետական Մայք Թերներն ասել է, թե հանձնաժողովը Կոնգրեսի անդամներին տեղեկատվություն է տրամադրել Միացյալ Նահանգների «ազգային անվտանգությանը սպառնացող լուրջ վտանգի» մասին։ Լրատվամիջոցների աղբյուրների համաձայն՝ այս սպառնալիքը կապված է Ռուսաստանի և տիեզերքում միջուկային զենքի հնարավոր տեղակայման հետ, գրում է BBC-ի ռուսական ծառայությունը։

«Ես խնդրում եմ նախագահ Բայդենին գաղտնազերծել այս սպառնալիքի հետ կապված բոլոր տեղեկությունները, որպեսզի Կոնգրեսը, վարչակազմը և մեր դաշնակիցները կարողանան բաց քննարկել այս սպառնալիքին արձագանքելու համար անհրաժեշտ գործողությունները»,- ասել է Թերները՝ չտրամադրելով լրացուցիչ տեղեկություններ:

Միևնույն ժամանակ, ըստ պաշտոնյաների, ԱՄՆ-ի և նրա դաշնակիցների համար ուղղակի և անմիջական սպառնալիք չկա:
Որոշ ամերիկյան լրատվամիջոցներ, հղում անելով անանուն պաշտոնյաների, ենթադրություն էին հայտնել, որ Թերները՝ Ուկրաինային հրատապ օգնություն տրամադրելու կողմնակիցը, աղմուկ է բարձրացրել, այդ թվում՝ Ներկայացուցիչների պալատին ստիպելու համար ընդունել այս օգնության համար բազմամիլիարդանոց հատկացումների մասին օրինագիծը:

Մինչ այս, Մայք Թերները նամակ է ուղարկել կոնգրեսականներին՝ որպես հրատապ մտահոգություն նշելով «ապակայունացնող օտարերկրյա ռազմական հնարավորությունները»: Նամակում ասվում է, որ Ներկայացուցիչների պալատի հետախուզության հանձնաժողովը փետրվարի 13-ին քվեարկել է օրենսդիրներին տվյալ հարցի վերաբերյալ որոշակի տեղեկատվության հասանելիություն տրամադրելու օգտին, և օրենսդիրներին ժամանակ է տվել մինչև ուրբաթ՝ այն վերանայելու համար:

ԱՄՆ նախագահ Ջո Բայդենի ազգային անվտանգության հարցերով խորհրդական Ջեյք Սալիվանը հրաժարվել է մեկնաբանել սպառնալիքների բնույթը, սակայն ասել է, որ զարմացած է Թերների՝ հայտարարություն տարածելու որոշումից, քանի որ ծրագրում էր հինգշաբթի հանդիպել Կոնգրեսի առաջնորդների հետ:

«Ես մի փոքր զարմացած եմ, որ կոնգրեսական Թերներն այսօր հրապարակային հայտարարություն արեց ծրագրված հանդիպումից առաջ, որտեղ մենք բոլորս կհանդիպենք մեր հետախուզության և պաշտպանության փորձագետների հետ», – ասել է Սալիվանը ճեպազրույցում:

ABC News-ը, վկայակոչելով երկու աղբյուրի, հայտնում է, որ խոսքը, հնարավոր է, ՌԴ-ի կողմից տիեզերքում միջուկային զենքի տեղակայման սպառնալիքի մասին է՝ պարզաբանելով՝ ոչ թե տիեզերքից միջուկային ռմբակոծման, այլ արբանյակների դեմ այդ զենքերի հնարավոր կիրառման համար։

Ռուսական կողմը դեռևս չի մեկնաբանել ամերիկյան լրատվամիջոցների հաղորդագրությունները։