Ադրբեջանի ՍԴ-ն պաշտոնապես հաստատել է ընտրություններում Ալիևի հաղթանակը

Ադրբեջանի Սահմանադրական դատարանը պաշտոնապես հաստատել է փետրվարի 7-ին տեղի ունեցած արտահերթ  նախագահական ընտրությունների արդյունքները և գործող նախագահ Իլհամ Ալիևի հաղթանակը։ Ադրբեջանական լրատվամիջոցների հաղորդմամբ՝ այսօր տեղի ունեցած ՍԴ պլենումի նիստից հետո դատարանի նախագահ Ֆարհադ Աբդուլլաևն ընթերցել է որոշումը։

Սահմանադրական դատարանը հաստատել է նախագահական ընտրությունների արդյունքները։ Ըստ ՍԴ որոշման՝ Կենտրոնական ընտրական հանձնաժողովի ամփոփիչ արձանագրության համաձայն՝ նախագահական ընտրություններում հաղթել է Իլհամ Ալիևը՝ հավաքելով ձայների 92,12 տոկոսը։ Ընտրություններին մասնակցել է 4մլն 967,795 ընտրող։

Նշենք, որ Ադրբեջանում ընտրություների քվեարկությունն ուղեկցվել է զանգվածային ընտրախախտումներով, որն արձանագրել են նաև ԵԱՀԿ/ԺՀՄԻԳ դիտորդական առաքելության ներկայացուցիչները։

Իլհամ Ալիևից զատ՝ ընտրություններին մասնակցում էր ևս 6 թեկնածու՝ Մեջլիսի պատգամավոր և Սոցիալական հետազոտությունների կենտրոնի խորհրդի նախագահ Զահիդ Օրուջը, պատգամավոր Ռազի Նուրուլլաևը, մեկ այլ պատգամավոր՝ «Համայն Ադրբեջանի ժողովրդական ճակատ» կուսակցության ղեկավար Գուդրաթ Հասանգուլիևը, «Մեծ արարում» կուսակցության ղեկավար և խորհրդարանի պատգամավոր Ֆազաիլ Մուստաֆան, Ադրբեջանի Լիբերալ-դեմոկրատական կուսակցության նախկին ղեկավար Ֆուադ Ալիևը, «Մեծ Ադրբեջան» կուսակցության նախագահ Էլշադ Մուսաևը, որոնք իրականում գործող իշխանությունների աջակիցներն են։

Էմմա Չոբանյան