08.12.2025 | 15:55
Վարդենիսում զինծառայող է մահացել․ ՀՀ ՊՆ
Քանի՞ վարորդ է վճարել 160 000-ական դրամները․ քաղաքացիները պնդում են՝ Երևանի կենտրոնը չի բեռնաթափվել. ՏԵՍԱՆՅՈՒԹ
Հասարակություն
12.02.2024 | 21:53
Երբ քաղաքային իշխանությունը հայտարարեց կարմիր գծերում ավտոմեքենա կայանելու վճարի կտրուկ թանկացման մասին, պնդում էր, որ դա արվում է Երևանի կենտրոնը բեռնաթափելու և խցանումները մեղմելու նպատակով։
Քաղաքապետարանից Factor TV-ին հայտնել են, որ 2024 թվականի հունվարի 30-ի դրությամբ՝ «Ա» գոտու ավտոկայանատեղի տարեկան դրույքաչափով վճարում է կատարվել 3090 մեքենայի համար, այսինքն՝ այդքան վարորդ վճարել է 160,000 դրամ՝ ամեն օր մեքենան կարմիր գծերում կայանելու հնարավորություն ունենալու համար։
«Բ» գոտում կայանման տարեկան վճարը, «Ա» գոտու համեմատ, էականորեն էժան է՝ 24,000 դրամ․ այս գոտին ներառում է կենտրոնից դուրս հատվածը։ Հունվարի 30-ի դրությամբ՝ «Բ» գոտու համար տարեկան վճարումներ կատարվել է 3500 մեքենայի համար։
Ստացվում է՝ միայն տարեկան կայանման համար քաղաքային բյուջե վճարված գումարն այս տարվա առաջին ամսում կազմում է շուրջ 578 մլն դրամ։
Նախորդ տարի, երբ կարմիր գծերում ավտոմեքենա կայանելու տարեկան վճարը 12,000 դրամ էր, հունվարի 30-ի դրությամբ՝ ավտոկայանատեղի տարեկան դրույքաչափով վճարում էր կատարվել 35,016 մեքենայի համար, այսինքն՝ 420 մլն դրամ, ինչը զգալիորեն քիչ է այս տարվա նույն ժամանակահատվածի համեմատ։
Բեռնաթափվե՞լ է, արդյոք, Երևանի կենտրոնը կայանման վճարը թանկացնելուց հետո․ քաղաքացիների կարծիքով՝ ոչ։
Քաղաքապետ Տիգրան Ավինյանը, մինչդեռ, պնդում է, թե կենտրոնի՝ բեռնաթափված չլինելու մասին պնդումներն իրականությանը չեն համապատասխանում։
«Վարորդի ընկեր» ՀԿ նախագահ Տիգրան Քեյանը հակադարձում է՝ կայանման վճարը թանկացնելով՝ հնարավոր չէ թեթևացնել մայրաքաղաքի երթևեկությունը։
Քեյանի դիտարկմամբ՝ վճարի թանկացումը պարզապես շատ լավ տարբերակ էր քաղաքային բյուջեն լցնելու համար։ Քննադատությունների ֆոնին, ավագանու որոշմամբ, կիրակի օրերին կարմիր գծերում կայանումը դարձավ անվճար․ Ավինյանը հայտարարեց, թե որոշումն ընդունելի է, քանի որ ի սկզբանե հայտարարել էին, որ սա միտված չէ հավելյալ գումարներ հավաքագրելուն։
Քաղաքային իշխանությունը լիահույս է, որ թանկացումը պետք է շատերին ստիպի հրաժարվել սեփական մեքենայով կենտրոն մտնելուց և օգտվել հասարակական տրանսպորտից։ Այնինչ, Factor TV-ն այսօր արձանագրել է, որ դա այնքան էլ հեշտ չէ․ Նոր Նորքի 1-ին զանգվածում, օրինակ, առավոտյան քաղաքացիները կախվել էին ավտոբուսների դռներից։
Մանրամասները՝ տեսանյութում։
Արփի Հակոբյան
