16.02.2026 | 23:24
Այրվել են պահեստային բաքերը և բեռնատար մեքենա. մանրամասներ Թալինի գազալցակայաններից մեկում բռնկված հրդեհից
Բանակում կորուստներն ավելանում են, պաշտոնյաները՝ հանձնարարականներ տալիս․ մտահոգիչ թվեր 2023-ին. ՏԵՍԱՆՅՈՒԹ
Քաղաքականություն
12.02.2024 | 21:10
Նախորդ տարի բանակում մահվան դեպքերը 30 տոկոսով աճել են. 2023 թվականին Զինված ուժերում գրանցվել է 83 մահ, իսկ 2022-ին մահվան 64 դեպք էր արձանագրվել։ 2023-ի դեպքերից 19-ը եղել է հրադադարի խախտման հետևանքով։ Վիճակագրությունն ամբողջացրել է Հելսինկյան քաղաքացիական ասամբլեայի Վանաձորի գրասենյակը։
2023 թվականին բանակում մահվան դեպքերի թվի աճը կապված է նաև տարեսկզբին Ազատ գյուղի զինվորական կացարանում բռնկված հրդեհի հետ, որի հետևանքով 15 զինծառայող զոհվեց։
Անցյալ տարի մտահոգիչ է եղել հրադադարի ռեժիմի խախտման հետևանքով մահացությունների թիվը, որը, 2022-ի համեմատ, աճել է 36%-ով։
Առողջական խնդիրներով զորակոչված և բանակում մահացած զինծառայողների խնդիրը նույնպես արդիական է մնում։ Ցավալի պատկերն ամբողջացնում է սպանությունների ու ինքնասպանությունների չնվազող թիվը, որին օրերս անդրադարձել էր նաև պաշտպանության նախարար Սուրեն Պապիկյանը։ Բանակի կազմավորման 32-ամյակի առիթով էլ վարչապետն էր իր ելույթում խոսել Զինված ուժերի խնդիրներից՝ հայտարարելով՝ բանակը պետք է դադարի լինել էժանագին կենացների օբյեկտ։
Իսկ գուցե բանակում մահվան դեպքերի մասով ծառացած խնդիրն ավելի՞ խորքային է. ազգային անվտանգության և ռազմական հարցերով փորձագետ Հրաչյա Արզումանյանը պատասխանում է՝ անկախություն հռչակած երկրի բանակում դեռևս սովետական բարքերն են իշխում։ Բարձր ամբիոններից հնչող ելույթների մակարդակից պետք է իջնել՝ կառավարության անդամներին հորդորում է Արզումանյանը։
Հայաստանում կոչերի ու հանձնարարականների պակաս չկա, գոնե Զինված ուժերում մահվան դեպքերի մասով։ Այս տարին սկսվել է բանակում իրար հաջորդող մահերով․ 1 օրում՝ մահվան 2 դեպք։ Փաստի առթիվ Փաշինյանը շտապեց հանձնարարական տալ՝ բանակում ոչ կանոնադրական հարաբերությունների կանխարգելման ուղղությամբ պետք է հետևողական աշխատել։ Գլխավոր շտաբի պետ Էդվարդ Ասրյանն էլ նույնաբովանդակ մեկ այլ հանձնարարական տվեց արդեն զորամասում․ պետք է անել ամեն հնարավորը՝ հետագայում նմանօրինակ դեպքերը բացառելու համար։ Նմանատիպ հանձնարարականներ եղել նաև նախորդիվ հանրային մեծ հնչեղություն ստացած մահվան ելքով միջադեպերից և պատահարներից հետո, բայց, ինչպես ցույց է տալիս վիճակագրությունը, դրանք եղել են խիստ անարդյունավետ։
Մանրամասները՝ տեսանյութում։
Ռոզա Վարդանյան
