Քաղաքականություն
12.02.2024 | 16:30
Եմենի հութի ապստամբների «Անսար Ալլահ» շարժումը հարձակվել է Կարմիր ծովում Star Iris առևտրային նավի վրա, որը, ըստ հարձակվողների, պատկանում է Միացյալ Նահանգներին: ՏԱՍՍ-ի փոխանցմամբ՝ այս մասին հայտարարել է շարժման ռազմական ներկայացուցիչ Յահյա Սարիան։
«Եմենի ռազմածովային ուժերը հականավային հրթիռներ են օգտագործել Կարմիր ծովում ամերիկյան Star Iris նավի վրա հարձակվելու համար: Հարվածը եղել է ուղիղ և ճշգրիտ»,- ասել է Սարիան հութիների կողմից վերահսկվող Al Masirah հեռուստաալիքի եթերում:
Ավելի վաղ Միացյալ Թագավորության ռազմածովային ուժերին կից գործող ծովային առևտրային համակարգող կենտրոնը (UKMTO) հայտնել էր, որ անանուն առևտրային նավի վրա հարձակվել են Մոչա նավահանգստային քաղաքից 40 ծովային մղոն հարավ։ Գերատեսչության տվյալներով՝ նավի ուղղությամբ երկու հրթիռ է արձակվել, սակայն անձնակազմը չի տուժել։
Marine Traffic ծառայության տվյալներով՝ Մարշալյան կղզիների դրոշով նավարկող Star Iris բեռնատար նավը հունվարի 12-ին դուրս է եկել բրազիլական Վիլա դու Կոնդե նավահանգստից։ Վերջին անգամ նավը գտնվելու վայրի մասին տվյալներ է փոխանցել փետրվարի 12-ին՝ Կարմիր ծովի կենտրոնական հատվածից։
Գազայի հատվածում հակամարտության սրացումից հետո «Անսար Ալլահ» շարժումը հայտարարել է, որ հարձակումներ է իրականացնելու Իսրայելի տարածքի վրա և թույլ չի տալու հարակից նավերին անցնել Կարմիր ծովի ջրերով և Բաբ ալ-Մանդեբի նեղուցով՝ մինչև պաղեստինյան անկլավում ռազմական գործողության դադարեցումը։
