Ինչու են Մուրացանի զինվորական հոսպիտալից հեռացվել նահատակված զինվորների լուսանկարները

Factor.am-ը ահազանգեր էր ստացել, որ Կենտրոնական կլինիկական զինվորական (Մուրացան) հոսպիտալի ադմինիստրացիայի 2-րդ հարկից   հեռացվել են Արցախյան պատերազմում նահատակված զինվորների լուսանկարները։ Մեր ստացած տեղեկատվությունը ճշտելու նպատակով փորձեցինք կապ հաստատել ՊՆ մամուլի քարտուղար Արամ Թորոսյանի հետ, սակայն ապարդյուն։ Ապա զանգահարեցինք Մուրացանի զինվորական հոսպիտալի տնօրենի ընդունարան, որտեղից մեզ պատասխանեցին. «Եթե ինչ-որ հարցեր ունեք, մոտեցեք ստեղ, մենք քաղաքային հեռախոսով ոչ մի բան չենք պատասխանում»։

Այցելեցինք Մուրացանի զինվորական հոսպիտալ, սակայն մեզ թույլ չտվեցին ներս մտել՝ պատճառաբանելով, որ նախարարությունից թույլտվություն է անհրաժեշտ: Երեկ ամբողջ օրը ՊՆ-ից թույլտվություն և մեկնաբանություն ստանալ չհաջողվեց, իսկ այսօր արդեն նախարարության մամուլի քարտուղար Արամ Թորոսյանը Factor.am-ին պարզաբանեց, թե որն է Մուրացանի զինվորական հոսպիտալից նահատակված զինվորների լուսանկարների հեռացման պատճառը:  

«Գլխավոր շտաբի համապատասխան կառուցվածքային ստորաբաժանումը բոլոր զորամասերի տեղեկատվության և ժամանցի սենյակներում իրականացնում է վերանորոգման աշխատանքներ, այդ թվում նաև տպագրական նյութերի, քանի որ ժամանակի ընթացքում դրանք մաշվում են: Իրականացվում են տպագրական նյութերի թարմացման, վերանորոգման, թեմատիկ առումով համալրման մի շարք աշխատանքներ: Իսկ Փառքի անկյուններում իրականացվում են ոճային առումով արդիականացման աշխատանքներ»,- փոխանցեց Արամ Թորոսյանը:

Միևնույն ժամանակ մեզ չհաջողվեց մամուլի քարտուղարից ստանալ հարցի պատասխանը՝  արդյո՞ք վերանորգման աշխատանքներից հետո հեռացված լուսանկարները նույնությամբ կտեղադրվեն:

Հիշեցնենք, որ երեկ տեղեկություն էր տարածվել, թե ԿԳՄՍ նախարարությունը հանձնարարական է ուղարկել ՀՀ տարբեր դպրոցների տնօրեններին` կրթօջախներից հեռացնել Արցախյան պատերազմում զոհված հերոսների Փառքի անկյունները։ Նախարարությունից, սակայն, հերքել էին այդ տեղեկությունը։

Անի Թամրազյան