07.10.2026 | 16:20
Հայաստանի Կիոկուշին կարատեի ֆեդերացիան կանցկացնի «Սամուրայ» մրցաշարը
Ըստ Ադրբեջանի ԿԸՀ-ի՝ Ալիևն առաջատարն է ձայների 92,05 տոկոսով
Քաղաքականություն
08.02.2024 | 11:20
Ադրբեջանի Կենտրոնական ընտրական հանձնաժողովի նախագահ Մազահիր Պանախովը մամուլի ասուլիսում հայտարարել է, որ Ադրբեջանի գործող նախագահ Իլհամ Ալիևը արտահերթ նախագահական ընտրություններում հավաքել է ձայների 92,05 տոկոս։ Նա ասել է, որ ԿԸՀ-ն ավարտել է քվեաթերթիկների 93,35 տոկոսի մշակումը։
Ալիևից հետո ամենաշատ ձայներ հավաքած թեկնածուն Զահիդ Օրուջն է՝ 2,19 տոկոս։ Ըստ հանձնաժողովի տվյալների՝ արտահերթ նախագահական ընտրություններին քվեարկել է 4 մլն 971,032 հազար ընտրող կամ քվեարկելու իրավունք ունեցողների 76,73 տոկոսը։
Ընտրատեղամասերը նախօրեին փակվել են ժամը 19։00-ին և դրանից մեկ ժամ անց, դեռ նախնական արդյունքներն անգամ չհրապարակված, Ալիևն արդեն շնորհավորանքներ էր ստանում։ Առաջինը Ալիևին զանգահարել և շնորհավորել են Ուզբեկստանի նախագահ Շավքաթ Միրզոևը և Բելառուսի նախագահ Ալեքսանդր Լուկաշենկոն։ Ավելի ուշ զանգահարել ու շնորհավորել են Թուրքիայի նախագահ Ռեջեփ Թայիփ Էրդողանը, Իրաքի, Սերբիայի, Տաջիկստանի, Ղազախստանի, Պակիստանի, Չինաստանի, Իրանի, Ղրղզստանի նախագահները, ինչպես նաև Հունգարիայի վարչապետը։
Հավելենք, որ արտահերթ նախագահական ընտրություններին մասնակցում էր ևս 6 թեկնածու՝ Մեջլիսի պատգամավոր և Սոցիալական հետազոտությունների կենտրոնի խորհրդի նախագահ Զահիդ Օրուջը, պատգամավոր Ռազի Նուրուլլաևը, մեկ այլ պատգամավոր՝ «Համայն Ադրբեջանի ժողովրդական ճակատ» կուսակցության ղեկավար Գուդրաթ Հասանգուլիևը, «Մեծ արարում» կուսակցության ղեկավար և խորհրդարանի պատգամավոր Ֆազաիլ Մուստաֆան, Ադրբեջանի Լիբերալ-դեմոկրատական կուսակցության նախկին ղեկավար Ֆուադ Ալիևը, «Մեծ Ադրբեջան» կուսակցության նախագահ Էլշադ Մուսաևը։
Հավելենք, որ Ադրբեջանում ընտրություններն ուղեկցվում էին զանգվածային լցոնումներով ու ընտրախախտումներով։
Էմմա Չոբանյան
