Թուրքիայի և Իսրայելի քաղաքացիություն ունեցող երկու կնոջ Ստամբուլում հարցաքննության են կանչել՝ իսրայելական բանակին միանալու որոշման համար

Ստամբուլի դատախազությունը որոշել է հարցաքննության կանչել Թուրքիայի և Իսրայելի քաղաքացիություն ունեցող երկու կնոջ՝ հոկտեմբերի 7-ին պաղեստինյան «ՀԱՄԱՍ» խմբավորման կողմից Իսրայելի վրա հարձակումից հետո Իսրայելի պաշտպանության բանակին միանալու որոշման համար, գրում է Turkish Minute-ը։

Մայն Գյումուշքայան և Ումայ Աքչայը Իսրայելի վրա ՀԱՄԱՍ-ի հարձակումից հետո սոցցանցերում հայտարարել էին, որ որոշել են միանալ Իսրայելի պաշտպանությանը՝ ՀԱՄԱՍ-ի դեմ կռվելու համար: Ավելի ուշ հրապարակումներում Գյումուշքայան կիսվել էր Իսրայելում պաշտպանության բանակի համազգեստով լուսանկարով, իսկ Աքչայն ասել էր, որ վերադարձել է Իսրայել և հպարտ է պաշտպանել իր հայրենիքը:

Երկու կանայք էլ սոցիալական ցանցերում ատելության հաղորդագրություններ են ստացել, որոշ թուրքեր ասել են, որ իրենք չեն ներկայացնում թուրք ժողովրդին և երբեք չպետք է վերադառնան Թուրքիա: Նրանք կանանց մեղադրել են իսրայելական բանակում «մանուկների մարդասպաններին» միանալու մեջ։

Իսրայելի կառավարության տվյալներով՝ հոկտեմբերի 7-ին Իսրայելի վրա ՀԱՄԱՍ-ի հարձակումների զոհերի թվում են եղել Թուրքիայի երեք քաղաքացիներ, որոնք նույնպես երկքաղաքացիություն ունեն։ Թուրքական իշխանությունները ոչ մի հայտարարություն չեն արել այդ մարդկանց ինքնության վերաբերյալ, ոչ էլ ցավակցություն հայտնել նրանց մահվան կապակցությամբ։

Թուրքիայում հակաիսրայելական տրամադրությունները գնալով ուժեղանում են՝ Գազայում մինչ այժմ Իսրայելի կողմից շարունակվող օդային և ցամաքային հարձակումների հետևանքով ավելի քան 24,000 մարդկանց սպանության պատճառով, հիմնականում՝ խաղաղ բնակիչների:

Ի տարբերություն ՆԱՏՕ-ի շատ դաշնակիցների՝ Եվրամիության և Պարսից ծոցի որոշ երկրների՝ Թուրքիան ՀԱՄԱՍ-ին ահաբեկչական կազմակերպություն չի համարում։ Թուրքիայի նախագահ Ռեջեփ Թայիփ Էրդողանը, որը պաղեստինյան հարցի բացահայտ ջատագովն է, Թուրքիայում հաճախակի հանդիպում է ՀԱՄԱՍ-ի անդամների հետ և նրանց համարում «ազատարարներ», որոնք կռվում են իրենց հողի համար, այլ ոչ թե ահաբեկիչներ։

Հիշեցնենք, որ օրերս էլ Թուրքիայում ձերբակալվել, այնուհետև արտաքսվել է իսրայելցի ֆուտբոլիստ Սագիվ Յեհեզկելին՝ ֆուտբոլային հանդիպման ժամանակ Իսրայելին ցուցաբերած աջակցության համար։

Էմմա Չոբանյան