24.06.2026 | 15:19
Ֆրանսիայում Էբոլայով վարակման առաջին դեպքն է հաստատվել
Դավոսում կոչ են արել Ուկրաինայում պատերազմը դադարեցնել դիվանագիտական ճանապարհով
Քաղաքականություն
17.01.2024 | 13:27
Շվեյցարական Դավոսում Համաշխարհային տնտեսական ֆորումի ժամանակ եվրոպացի և համաշխարհային քաղաքական գործիչներն ու խոշոր բիզնեսի ներկայացուցիչները շարունակել են աջակցություն հայտնել Ուկրաինային ռուսական ագրեսիայից պաշտպանվելու հարցում և մտահոգություն հայտնել, որ Կիևը կորցնում է արտաքին ֆինանսական աջակցությունը վճռորոշ պահին:
Միևնույն ժամանակ, նրանք ինչպես հրապարակավ, այնպես էլ կուլիսներում կոչ են արել դիվանագիտական ճանապարհով դադարեցնել պատերազմը, գրել է ամերիկյան The New York Times-ը։
Հրապարակման մեջ ասվում է, որ ուկրաինական պատերազմի թեման այս շաբաթ Դավոսում «նկատելի է, բայց ոչ գերիշխող»։
The New York Times-ը նշել է երկու իրադարձություն, որոնք երեքշաբթի ֆորումի ընթացքում նվիրված են եղել Ուկրաինային. Եվրոպայի՝ դեպի վերականգնվող էներգիայի անցման համար Ուկրաինայի հանքային պաշարների կարևորության վերաբերյալ քննարկումը, և չորս կանանց ելույթները, ովքեր կռվել են Ուկրաինայի համար այդ պատերազմում:
Բացի այդ, հունվարի 16-ին Ուկրաինայի նախագահ Վլադիմիր Զելենսկին ելույթ է ունեցել Դավոսի ֆորումում։ Նա մերժել է Ռուսաստանի Դաշնության և Ուկրաինայի միջև հակամարտությունը սառեցնելու գաղափարը՝ Վլադիմիր Պուտինին անվանելով «գիշատիչ, որը չի բավարարվի սառեցված սնունդով»։
