01.11.2024 | 23:19
Հրդեհ Գյումրու տներից մեկում
ՄԱԿ-ի ԱԽ-ն հութիներից պահանջել է դադարեցնել Կարմիր ծովում նավերի վրա հարձակումները
Քաղաքականություն
11.01.2024 | 22:29
ՄԱԿ-ի Անվտանգության խորհուրդն իր նիստում հավանություն է տվել ԱՄՆ-ի և Ճապոնիայի կողմից առաջարկված բանաձևի նախագծին, որը դատապարտում է Եմենի հութիների հարձակումները Կարմիր ծովում նավերի վրա։ Բանաձևում ՄԱԿ-ի Անվտանգության խորհուրդը պահանջում է, որ հութիներն անմիջապես դադարեցնեն գրոհները և այլ «ագրեսիվ գործողություններ», փոխանցում է Կոմերսանտը:
Անվտանգության խորհրդի 11 անդամների քվեարկության ժամանակ փաստաթղթի ընդունմանը ձեռնպահ են քվեարկել չորս պետություններ, այդ թվում՝ Ռուսաստանը, Ալժիրը և Չինաստանը։ Ռուսաստանի Դաշնությունն առաջարկել է բանաձևում երեք ուղղում կատարել, սակայն բոլորն էլ մերժվել են, ասել է ՄԱԿ-ում ՌԴ մշտական ներկայացուցիչ Վասիլի Նեբենզյան։
Բանաձևի տեքստի համաձայն՝ ՄԱԿ-ի անդամ բոլոր երկրները կարող են «միջազգային իրավունքի համաձայն պաշտպանել իրենց նավերը հարձակումներից, այդ թվում՝ նավագնացության իրավունքներին և ազատություններին սպառնացող նավերից»։
Փաստաթուղթը նաև դատապարտում է հութիներին զենքի մատակարարումը և կոչ է անում «լրացուցիչ ակտիվ գործնական համագործակցություն՝ կանխելու հութիների հետագա հարձակումներ իրականացնելու համար անհրաժեշտ միջոցներ ձեռք բերելը»:
Կարմիր ծովը Սուեզի ջրանցքով Ասիան և Եվրոպան կապող ամենակարճ ջրային ճանապարհն է: Համաշխարհային կոնտեյներային երթևեկության շուրջ մեկ երրորդն անցնում է այստեղով:
