31.03.2026 | 17:06
400 քառակուսի մետրից փոքր հողամասերում բնակելի տուն կառուցելու սահմանափակումը հանվել է․Քաղաքաշինության կոմիտե
Արաբ գործարարը մտադիր է ներդրումներ կատարել Հայաստանի ճանապարհաշինության ոլորտում
Տնտեսություն
07.07.2017 | 21:00
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը հուլիսի 7-ին ընդունել է Արաբական Միացյալ Էմիրությունների մի խումբ գործարարների՝ Աթեք Մոհամեդ Մեսֆեր Ալդահերիի գլխավորությամբ։ Այս մասին տեղեկացնում են ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունից:
Գործարարները նշել են, որ նպատակ ունեն Հայաստանում մի շարք ծրագրեր իրականացնել, այդ թվում՝ նաև տրանսպորտի ոլորտում:
«Հայաստանում մենք տեսնում ենք դրական միջավայր ներդրումներ կատարելու համար։ Այստեղ աշխատելով՝ նպատակ ունենք նաև աշխատատեղեր ստեղծել Հայաստանի քաղաքացիների համար»,- ասել է Աթեք Մոհամեդ Մեսֆեր Ալդահերին ։
Գործունեության շրջանակների առնչությամբ նշվել է, որ հարուստ փորձ ունեն ճանապարհաշինության, մասնավորապես՝ մայրուղիներ և երկաթուղիներ կառուցելու, կամրջաշինության ոլորտներում։ Խոշոր ծավալի ծրագրեր են իրականացվել Չինաստանում, Ռուսաստանում, Իրաքում և այլ պետություններում:
Նախարար Վահան Մարտիրոսյանը գործարարներին առաջարկել է համագործակցության հնարավոր մի քանի տարբերակներ, այդ թվում՝ տրանսպորտային համակարգեր ստեղծելու, Երևանից Դիլիջան արագընթաց երկաթուղի, «Զվարթնոց» օդանավակայանը մայրաքաղաքին կապող արագընթաց նոր ճանապարհ կառուցելու ուղղությամբ։
Պայմանավորվածություն է ձեռք բերվել ձևավորել աշխատանքային խումբ և երկու կողմերի մասնագետների մասնակցությամբ առավել մանրամասն քննարկել համագործակցության հնարավոր շրջանակները, դրանց իրականացման ուղղությունները։
