02.11.2024 | 13:09
Նոյեմբերի 1-ին «Երևանի ավտոբուս» ՓԲԸ-ի կողմից հավաքագրվել է 31 678 200 ՀՀ դրամ
Լրագրողների շրջանում մահվան դեպքերի թիվը նվազել է․ RSF-ի տարեկան զեկույցը
Քաղաքականություն
14.12.2023 | 15:46
«Լրագրողներ առանց սահմանների» ոչ կառավարական իրավապաշտպան կազմակերպությունը հրապարակել է լրատվամիջոցների աշխատակիցների շրջանում մահվան դեպքերի մասին իր տարեկան զեկույցը՝ նշելով, որ մահվան դեպքերը նվազել են՝ չնայած Գազայի հատվածում նոր պատերազմին։
Չնայած Մերձավոր Արևելքում հակամարտության բռնկմանը, որը RSF-ն իր զեկույցում անվանում է «ողբերգություն», իրենց աշխատանքը կատարելիս սպանված լրագրողների թիվը նվազել է՝ հասնելով 2002 թվականից ի վեր ամենացածր մակարդակին:
«Լրագրողներ առանց սահմանների» կազմակերպության տարեկան զեկույցում ասվում է, որ 2023 թվականին սպանվել է լրատվամիջոցների 45 աշխատակից։ Դրանցից 17-ը լուսաբանել են ՀԱՄԱՍ-ի հետ Իսրայելի պատերազմը։
Տարվա ընթացքում ուկրաինական պատերազմի պատճառով երկու լրագրող է մահացել։
«Լրագրողներ առանց սահմանների» կազմակերպության զեկույցը նաև ցույց է տալիս, որ պատահարների մակարդակը վերջին տարիներին, անցյալի համեմատ, կայունացել է։ Անկումը հիմնականում պայմանավորված է 2013 թվականից Սիրիայում և Իրաքում աշխատող լրագրողների անվտանգության միջոցառումների բարելավմամբ:
Լատինական Ամերիկայում նույնպես գրանցվել է մահացության զգալի անկում՝ 2022 թվականի 26 դեպքից 2023-ին հասնելով 6-ի: Սակայն տարածաշրջանը շարունակում է վտանգավոր մնալ, քանի որ զինված հարձակումներն ու առևանգումները մշտական սպառնալիք են որոշ երկրներում լրատվամիջոցների համար, հատկապես՝ Մեքսիկայում:
Կազմակերպությունը հրապարակել է նաև ամբողջ աշխարհում լրագրողների կալանավորման վիճակագրությունը։ Չինաստանը շարունակում է մնալ հալածված լրագրողների թվով առաջատարը։
Մեկ տարվա ընթացքում 28 լրագրողներ հայտնվել են Ռուսաստանի քննչական մեկուսարաններում և գաղութներում, այդ թվում՝ ԱՄՆ քաղաքացիություն ունեցող լրատվամիջոցների երկու աշխատակիցներ՝ Էվան Գերշկովիչը և Ալսա Կուրմաշևան:
Բանտում գտնվող լրագրողների թվի նվազումը (դեկտեմբերի 1-ի դրությամբ՝ 50-ով պակաս) կարելի է մասամբ բացատրել նրանով, որ Իրանը (-24) և Թուրքիան (-23) այս ժամանակահատվածում ճաղերի հետևում ավելի քիչ լրագրողներ ունեն։ Դա, սակայն, չի նշանակում, որ այս երկրներում լրագրողներին չեն բանտարկում․ Իրանում և Թուրքիայում լրագրողների նկատմամբ բռնաճնշումների մեթոդներից մեկը բազմակի ազատազրկումն է։ 2023 թվականին բանտարկվել է 43 թուրք և 58 իրանցի լրագրող։
