Քաղաքականություն
06.12.2023 | 23:06
Ադրբեջանի նախագահ Իլհամ Ալիևը դժգոհել է ԵՄ արտաքին հարաբերությունների ու անվտանգության հարցերով հանձնակատար Ժոզեպ Բորելի՝ Արցախում էթնիկ զտմանը վերաբերող հայտարարությունների առնչությամբ։
«Պարոն Բորելի վերջին հայտարարությունները շատ անարդյունավետ են: Երեկ նա ասել է, որ 150 հազար հայ լքել է Ղարաբաղը։ Սա լիովին սուտ հայտարարություն է։ Ցավում եմ, որ եվրոպացի նման փորձառու դիվանագետը ստում է, նույնիսկ հայերն իրենք են ընդունում, որ Ղարաբաղից 100 հազար մարդ է գնացել, ոչ թե 150 հազար, այսինքն՝ եթե պարոն Բորելը շարունակի նույն ոգով, մեկ ամսից կասի 200 հազար մարդ։ Միգուցե պարոն Բորելը երազում է։ Սա բացարձակապես անընդունելի է։ Սա ոչ միայն թվերի շահարկում է, այլ մեղադրանք Ադրբեջանի հասցեին»,- ասել է Ալիևը։
Հիշեցնենք, որ նախօրեին Բորելը հայտարարել էր, որ ուժի կիրառմամբ 150,000 մարդ ԼՂ-ից ստիպված էր հեռանալ՝ լքելով իրենց տները։
Ադրբեջանի նախագահը նաև հայտարարել է, որ դժգոհ է Բաքվի նկատմամբ ԵՄ որոշ պաշտոնյաների քաղաքականությունից։ Նա Ժոզեպ Բորելին ու Եվրախորհրդարանի նախագահ Ռոբերտա Մեցոլային անվանել է «պոպուլիստներ»։ Հիշեցնենք, որ Մեցոլան Արցախում էթնիկ զտումից հետո ՀՀ վարչապետ Նիկոլ Փաշինյանին հրավիրել էր Եվրախորհրդարանում ելույթ ունենալ։
«Ցավոք, Եվրոպայի առաջնորդների թվում կան պոպուլիստներ, ինչպիսիք են պարոն Բորելը և տիկին Մեցոլան։ Ես միշտ սիրում եմ բաց խոսել։ Ես դժգոհ եմ Ադրբեջանի նկատմամբ նրանց քաղաքականությունից և վերաբերմունքից։ Սա անարդար է և լիովին չի բխում Եվրամիության շահերից։ Բայց երբ մենք խոսում ենք Եվրահանձնաժողովի մասին՝ որպես ամբողջության, շատ լավ հարաբերություններ ունենք: Մենք սա շատ ենք կարևորում, դրանք ռազմավարական նշանակություն ունեն։ Դա վերաբերում է ոչ միայն էներգիային, նավթին ու գազին։ Շուտով մենք կհամագործակցենք ջրածնի հարցում»,- հայտարարել է Ադրբեջանի նախագահը։
Ալիևը, միաժամանակ, Եվրախորհրդարանի պատգամավորներին անվանել է «մոլագարներ»։
«Դա անպատասխանատու մարդկանց խումբ է։ Նրանցից ոմանք իրենց մոլագարի պես են պահում, նրանց հակաադրբեջանական զգացմունքներն ու հայտարարությունները դուրս են մարդու նորմալ հոգեբանական վիճակից։ Ուզում եմ հնարավորինս դիվանագիտական բառապաշար օգտագործել։ Ի՞նչ կարող ենք անել։ Նրանք ընդունել են 10-ից ավելի հակաադրբեջանական բանաձևեր»,- դժգոհել է Ալիևը։
Էմմա Չոբանյան
