24.06.2026 | 23:13
Վստահ եմ, որ ամուր գործընկերությունը կշարունակի զարգանալ. ՊԵԿ նախագահը՝ ՎԶԵԲ ներկայացուցիչներին
Պետդուման կոչ է արել զինվորական ծառայության ժամկետը մեկից դարձնել երկու տարի
Քաղաքականություն
04.12.2023 | 21:17
Ռուսաստանում մարտունակ զինվորներ պատրաստելու համար անհրաժեշտ է զինվորական ծառայության ժամկետը մեկ տարուց հասցնել երկուսի։ Նման հայտարարությամբ են հանդես եկել Պետդումայի պաշտպանության հանձնաժողովի երկու անդամներ՝ Անդրեյ Գուրուլևը (Միացյալ Ռուսաստան) և Վիկտոր Սոբոլևը (ՌԴ Կոմունիստական կուսակցություն), գրում է The Moscow Times-ը։
«Ժամկետային զինծառայողների ծառայությունը պետք է երկու տարի լինի, այդ ժամանակ կլուծվի ժամկետային զինծառայողների թվի խնդիրը։ Երկրորդ՝ կբարձրանա մոբիլիզացիոն ռեսուրսի նախապատրաստման որակը»,- իր Telegram-ալիքում գրել է Գուրուլևը։
Նրա խոսքով՝ մեկամյա ծառայությունը «պատրաստված զինվոր» չի տալիս։
«Ծրագրերի տարբեր խորացումներն ու ընդլայնումները չեն օգնի»,- ընդգծել է պատգամավորը։
Այս հայտարարությունից հետո նույնանման հայտարարությամբ է հանդես եկել նաև Սոբոլևը։
«Բանակում ծառայության ժամկետի ավելացման հարցը վաղուց է հասունացել։ Զինվորները պետք է ծառայեն առնվազն մեկուկես տարի, որից առաջին վեց ամիսները պետք է վերապատրաստվեն ուսումնական ստորաբաժանումներում։ Իսկ հաջորդ տարին կամ, ավելի լավ է, մեկուկես տարին լինեն անմիջականորեն զորքերում: Այդ դեպքում մեր զորքերն իսկապես մարտունակ կլինեն»,- The Moscow Times-ի փոխանցմամբ ասել է պատգամավորը։
Նրա խոսքով՝ վերջնական որոշումը Ռուսաստանի նախագահ Վլադիմիր Պուտինինն է, բայց ոչ ոք դեմ չի լինի այս որոշմանը, եթե այն օգնի պաշտպանել երկրի ինքնիշխանությունը։
