30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Ադրբեջանում USAID-ի գործունեության համար այլևս տեղ չկա․ Հաջիև
Քաղաքականություն
22.11.2023 | 12:48
USAID-ի կողմից Արցախից բռնի տեղահանված հայերին հավելյալ օգնություն հատկացնելու հայտարարությունները դժգոհություն են հարուցել Բաքվում։ Ադրբեջանի նախագահի օգնական Հիքմեթ Հաջիևը սոցցանցում գրառում է արել՝ ԱՄՆ-ին մեղադրելով «ադրբեջանական հողերի օկուպացիայի ընթացքում ագրեսոր» Հայաստանի կողքին կանգնելու մեջ։
«Սխալ կլինի պնդել ակադեմիական կամ մասնագիտական անաչառության մասին, քանի որ Սամանթա Փաուերը, որպես համալսարանի մարդու իրավունքների գծով պրոֆեսոր, իր «Խնդիրը դժոխքից. Ամերիկան և ցեղասպանության դարը (2002)» քարոզչական գրքում կատարյալ լռությամբ է անցել Հայաստանի կողմից իրականացված ցեղասպանության ու անմեղ ադրբեջանցի խաղաղ բնակիչների նկատմամբ վայրագությունների կողքով։ Որպես ՄԱԿ-ի Անվտանգության խորհրդում ԱՄՆ մշտական ներկայացուցիչ նա երբեք չի համարձակվել բարձրացնել ադրբեջանցի փախստականների և ներքին տեղահանվածների խնդրի մասին և պահանջել ՄԱԿ-ի Անվտանգության խորհրդի բանաձևերի կատարում, առավել ևս՝ հայկական օկուպացիայի դատապարտում»,-հայտարարել է Հաջիևը։ Նա Փաուերին մեղադրել է նաև Ռուբեն Վարդանյանի հետ սերտ կապեր ունենալու մեջ։
«Ադրբեջանաֆոբիան, թուրքաֆոբիան, քաղաքական կոռուպցիան, փողերի լվացումը և քաղաքական շահարկումները, այսպես կոչված, «Ավրորա» մրցանակի շրջանակներում ակնհայտորեն Ռուբեն Վարդանյանի և Սամանթա Փաուերի ընդհանուր արժեքներն ու շահերն էին։ Դիմակները հանված են։ Ադրբեջանում այլևս տեղ չկա USAID-ի գործունեության համար»,- գրել է Հաջիևը՝ ակնարկելով, որ Ադրբեջանի իշխանությունները մտադիր են երկրում դադարեցնել կառույցի գործունեությունը։
Սամանթա Փաուերի հասցեին քննադատություն է հնչեցրել նաև Ադրբեջանի ԱԳՆ խոսնակը։
«Ադրբեջանի Ղարաբաղի շրջանից հայ բնակիչների միգրացիան Հայաստան որպես բռնի տեղահանություն ներկայացնելու փորձը (Սամանթա Փաուերի) անհիմն է և անարդար։ Սա երկակի ստանդարտների, ընտրովի մոտեցման և Ադրբեջանի նկատմամբ անարդար վերաբերմունքի հերթական ցուցադրումն է»,- ասել է Այխան Հաջիզադեն։ Հիշեցնենք, որ նախօրեին իր ուղերձում Փաուերը հայտարարել էր, որ ԱՄՆ-ն շարունակում է մնալ ԼՂ-ի հայերի կողքին։
«Երկու ամիս առաջ Ադրբեջանի ռազմական գործողությունը Լեռնային Ղարաբաղում ստիպեց ավելի քան 100 հազար մարդու լքել իրենց տները և տեղափոխվել հարևան Հայաստան։ ԱՄՆ-ը շարունակում է մնալ ԼՂ-ի էթնիկ հայերի կողքին։ Այսօր ԱՄՆ-ը հայտարարում է լրացուցիչ 4 միլիոն դոլար հատկացնելու մասին Լեռնային Ղարաբաղից տեղահանվածներին օգնելու համար: Մենք երախտապարտ ենք Հայաստանի կառավարությանը տեղահանվածներին հոգատարությամբ ընդունելության համար և կշարունակենք աջակցել նրանց՝ որպեսզի մարդիկ ստանան իրենց անհրաժեշտ օգնությունը: ԱՄՆ Միջազգային զարգացման գործակալության այս նոր ֆինանսավորմամբ 70 հազար մարդու տրամադրվում է շտապ անհրաժեշտ մարդասիրական օգնություն, ինչպիսիք են պարենային օգնությունը, մարդասիրական պաշտպանությունը և շտապ ապաստան: Ի արձագանք ԼՂ-ի իրադարձություններին՝ ԱՄՆ-ի հատկացրած մարդասիրական օգնությունն այժմ կազմում է 28 միլիոն դոլար՝ սկսած 2020 թվականից: Հայաստան կատարած իմ վերջին այցի ժամանակ ես հենց ԼՂ-ից տեղահանվածներից շատերից լսեցի իրենց տները լքելու ահռելի դժվարությունների և սրտի ցավի մասին: Մենք կշարունակենք նրանց աջակցելու համար անել ամեն ինչ, ինչպես նաև նրանց համար, ովքեր առատաձեռնորեն հյուրընկալում են նրանց Հայաստանում»,- նշել էր Սամանթա Փաուերը X-ի իր էջում։
Էմմա Չոբանյան
