Խաղաղության արմատները ոչ թե Վաշինգտոնում, Բրյուսելում ու Փարիզում են, այլ տարածաշրջանում․ Հաջիև

Հայաստանը պետք է հասկանա, որ խաղաղության արմատները ոչ թե Վաշինգտոնում, Բրյուսելում ու Փարիզում են, այլ տարածաշրջանում։ Լրագրողների հետ զրույցում հայտարարել է Ադրբեջանի նախագահի օգնական Հիքմեթ Հաջիևը՝ պնդելով, թե «Հայաստանը պետք է առաջ մղի երկկողմ բանակցությունները, այլ ոչ թե փորձի խառնել երրորդ կողմերին տարածաշրջանում տիրող իրավիճակին»։

«Մեզ համար պատերազմն ավարտվել է, նոր ստատուս քվո է ի հայտ եկել։ Նախկին ստատուս քվոն անընդունելի էր, իսկ այժմյանը հիմնված է միջազգային իրավունքի վրա։ Հետևաբար՝ խաղաղության համաձայնագրի ստորագրման համար որևէ խոչընդոտ չի մնացել»,- ասել է Հաջիևը։

Նա նաև մերժել է Հայաստանի կողմից առաջարկվող «Խաղաղության խաչմերուկ» նախագծի գաղափարը, որն արդեն իսկ արժանացել է միջազգային հանրության աջակցությանն ու հավանությանը։ Ըստ Բաքվի՝ միայն Ադրբեջանի առաջարկներն են ընդունելի ու իրատեսական, իսկ ահա Հայաստանինը՝ ոչ։

«Այն ուտոպիստական ​​բնույթ ունի: Վերջին երեք տարիներին մենք բանակցել ենք, բայց արդյունք չի եղել։ Ուստի՝ Հայաստանը պետք է քննարկի ու մտածի, թե որքանով է արդյունավետ։ Ադրբեջանն ուներ նաև «պլան Բ»: Ծրագիրը Իրանի տարածքով տրանսպորտային կապեր հաստատելն է: Իրանի և Ադրբեջանի միջև արդեն ստորագրվել են միջկառավարական փաստաթղթեր։ Մյուս կողմից՝ շարունակվում է մեր համագործակցությունը եղբայրական Թուրքիայի հետ Կարս-Իգդիր երկաթուղու կառուցման հարցում։ Միջին միջացքը նոր իրողություններ է բացում»,- ասել է Ադրբեջանի նախագահի օգնականը։