Իտալիայի և Ադրբեջանի միջև ռազմական համագործակցությունն ամրապնդվում է, սպառազինության վաճառքի գործարքներ են կնքվում

Հռոմի և Բաքվի միջև կրկին ակտիվացել են ռազմական շփումները։ Մասնավորապես, Արաբական Միացյալ Էմիրություններում «Dubai Airshow 2023» միջազգային ցուցահանդեսի շրջանակում հանդիպել են Ադրբեջանի և Իտալիայի պաշտպանության նախարարներ Զաքիր Հասանովը և Գիդո Կրոզետոն, քննարկել Բաքվի և Հռոմի միջև ռազմական համագործակցության հեռանկարները։

«Հանդիպման ընթացքում քննարկվել են ռազմական, ռազմատեխնիկական, ռազմակրթական և այլ ոլորտներում Ադրբեջանի և Իտալիայի միջև համագործակցության զարգացման հեռանկարները, ինչպես նաև փոխադարձ հետաքրքրություն ներկայացնող մի շարք այլ հարցեր»,- ասվում է Ադրբեջանի ՊՆ հաղոդագրության մեջ։

Իր հերթին, Իտալիայի ՊՆ ղեկավար Կրոզետոն հայտնել է, որ Զաքիր Հասանովի հետ հանդիպման ժամանակ կառուցողական բանակցություններ են տեղի ունեցել պաշտպանության ոլորտում ընդհանուր հետաքրքրություն ներկայացնող հարցերի և ռազմակրթական, կադրերի պատրաստման ոլորտում համագործակցության շուրջ։

«Ադրբեջանը կենտրոնական դեր է խաղում եվրասիական տարածքում»,- ասել է իտալացի նախարարը։

Բացի այդ, Զաքիր Հասանովը «Dubai Airshow 2023» միջազգային ցուցահանդեսում ծանոթացել է իտալական Leonardo ընկերության արտադրած սպառազինությանն ու ռազմական տեխնիկային։

«Leonardo ընկերության ղեկավարության հետ հանդիպմանը հատկապես ընդգծվել է ռազմատեխնիկական համագործակցության զարգացման կարևորությունը, քննարկվել են փոխադարձ հետաքրքրություն ներկայացնող մի շարք հարցեր»,- հայտնում է Ադրբեջանի ՊՆ-ն։

Հիշեցնենք, որ հոկտեմբերի 31-ին էլ այցով Բաքվում էր Իտալիայի Զինված ուժերի գլխավոր շտաբի պետ, ծովակալ Ջուզեպպե Կավո Դրագոնեն, որը մի շարք հանդիպումներ էր ունեցել։ Ի դեպ, օրերս Իտալիայի ԳՇ պետն այցով ժամանել էր նաև Հայաստան։

Հայտնի է դարձել նաև, որ Ադրբեջանում Իտալիայի դեսպանատանը ռազմական կցորդի գրասենյակ է բացվել։ Այս մասին հայտնել է դիվանագիտական ​​առաքելության ղեկավար Կլաուդիո Տաֆֆուրին։ Նա նշել է, որ Իտալիան և Ադրբեջանը, այլ ոլորտների հետ մեկտեղ, համագործակցում են նաև ռազմական ոլորտում։

Հավելենք, որ վերջին տարիներին, հատկապես՝ Արցախյան 44-օրյա պատերազմից հետո, Բաքվի և Հռոմի միջև ռազմական շփումները բավական ակտիվացել  են, տեղի են ունենում նաև հաճախակի փոխայցելություններ։

Իտալական La Repubblica-ն սեպտեմբերին գրել էր, որ Ադրբեջանի իշխանություններն ամիսներ շարունակ բանակցել են Իտալիայի հետ զենքի գնման շուրջ։ Լրատվամիջոցի տվյալներով՝ Բաքուն ակնկալում է ձեռք բերել ուսումնական ինքնաթիռներ, ինքնաձիգներ, զենիթային համակարգեր, ռազմատրանսպորտային ինքնաթիռներ, սուզանավեր։ Գործարքի ընդանուր արժեքը գնահատվում է 1-2 միլիարդ եվրո։ Լրատվամիջոցը, միաժամանակ, նշել է, որ Արցախում վերջին իրադարձությունները հիմա խնդիր են Իտալիայի կառավարության համար․ բոլոր պայմանագրերը դեռ արգելափակված են UAMA-ի հատուկ գերատեսչության թույլտվության բացակայության պատճառով, որը վերահսկում է իտալական զենքի մատակարարման թույլտվությունների տրամադրումը։ 1992 թվականի կանոնների համաձայն՝ զենքը չի կարող վաճառվել երկրի, որը գտնվում է հակամարտության մեջ։ Ըստ լրատվամիջոցի՝ դրա հետ կապված Բաքուն սկսել է այլընտրանքային արտադրողների փնտրել Թուրքիայում և Իսրայելում։

Հունիսին էլ իտալական Leonardo կոնցեռնը հայտարարել էր Ադրբեջանի ռազմաօդային ուժերի համար C-27J տրանսպորտային ինքնաթիռների մատակարարման պայմանագրի կնքման մասին։ Ստորագրման արարողությանը մասնակցել էին երկու երկրների ՊՆ ներկայացուցիչները։

Էմմա Չոբանյան