07.10.2026 | 14:29
Սեպտեմբերին Հայաստան է այցելել 290 հազար զբոսաշրջիկ․ Պապոյան
Ադրբեջանի ռազմաօդային ուժերի համար իտալական C-27J ինքնաթիռների մատակարարման համար Բաքուն և Հռոմը պայմանագիր են ստորագրել
Քաղաքականություն
09.06.2023 | 21:44
Իտալական Leonardo կոնցեռնը հայտարարել է Ադրբեջանի ռազմաօդային ուժերի համար C-27J տրանսպորտային ինքնաթիռների մատակարարման պայմանագրի կնքման մասին, հայտնում են ադրբեջանական լրատվամիջոցները։
«Իտալիայի և Ադրբեջանի միջև առևտրային համագործակցությունն ամրապնդվել է C-27J Spartan-ի մատակարարման պայմանագրի ստորագրմամբ»,- ասվում է ընկերության հաղորդագրության մեջ։
Նշվում է, որ ստորագրման արարողությանը մասնակցել են երկու երկրների ՊՆ ներկայացուցիչները։
«Ի սկզբանե էներգետիկ ոլորտի հետ կապված Իտալիայի և Ադրբեջանի համագործակցությունն այժմ տարածվում է պաշտպանական արդյունաբերության արտադրանքի վրա՝ Իտալիայի Պաշտպանության նախարարության աշխատանքային խմբի արժեքավոր ներդրման շնորհիվ: Համաձայնագիրն Ադրբեջանի զինված ուժերի արդիականացման լայնածավալ ծրագրի մի մասն է, որը գնալով ավելի մեծ ուշադրություն է դարձնում իտալական արդյունաբերության արտադրանքին»,- ասվում է հաղորդագրության մեջ։
Շեշտվում է, որ C-27J Spartan ինքնաթիռն ունակ է կատարել առաջադրանքների լայն շրջանակ քաղաքացիական բնակչության պաշտպանության համար, «համարվում է իդեալական ինքնաթիռ» տարբեր առաքելությունների իրականացման, դեսանտայինների, հատուկ նշանակության ուժերի գործողությունների, հումանիտար օգնության և այլնի համար։
Հավելենք, որ այս օրերին Իտալիայում էր գտնվում Ադրբեջանի ՊՆ պատվիրակությունը։ Մասնավորապես, Ադրբեջանի պաշտպանության փոխնախարար, ռազմատեխնիկական ապահովման գլխավոր վարչության ղեկավար Ագիլ Գուրբանովը հանդիպել է այս երկրի պաշտպանության նախարար Գուիդո Կրոզետտոյի հետ։
Ընդհանրապես, ռազմական ոլորտում Իտալիայի ու Ադրբեջանի համագործակցությունն ինտենսիվ է զարգանում։ Ադրբեջանական մամուլում ավելի վաղ նույնիսկ տեղեկություններ էին տարածվել, որ Բաքուն Իտալիայից ռազմաուսումնական M-346 ինքնաթիռներ է ստանալու։
Էմմա Չոբանյան
