27.04.2026 | 22:34
Թուրքիայի ցամաքային զորքերի հրամանատարն այցով Ադրբեջանում է
Ադրբեջանն Իսրայելից 1,2 մլրդ դոլարի ՀՕՊ համակարգեր է գնելու
Քաղաքականություն
13.11.2023 | 17:31
Մի քանի ամիս առաջ Israel Aerospace Industries-ը (IAI) Ադրբեջանում իրականացրել է Barak MX համակարգերի հաջող ցուցադրություն։ Ադրբեջանական լրատվամիջոցների հաղորդմամբ՝ այս մասին հայտնել է Defense Industry Europe-ը։
Բաքվի պաշտոնական հաղորդագրության համաձայն՝ փորձարկումները ներառել են Barak MX համակարգի տարբեր տարբերակների բազմաթիվ արձակումներ։
Իսրայելական արտադրության տարբեր հակաօդային պաշտպանության համակարգեր Ադրբեջանում օգտագործվում են մի քանի տարի, սակայն վերջին ցուցադրությունը եղել է արդիականացված տարբերակով։ Barak MX-ը հակաօդային պաշտպանության մոդուլային համակարգ է, որը նախատեսված է հրթիռների և ավիացիոն սպառնալիքների դեմ պայքարելու համար: Այն գործում է ինչպես ծովային հարթակներում, այնպես էլ ցամաքում։
Նշվում է, որ Ադրբեջանը Իսրայելից հավելյալ կգնի Barak MX ՀՕՊ համակարգեր՝ 1,2 մլրդ դոլար արժողությամբ։
Հավելենք, որ Factor TV-ն ավելի վաղ ներկայացրել էր, որ այս համակարգերն Ադրբեջանում զորավարժությունների ժամանակ փորձարկվել էին։
Ուշագրավ է, որ պաշտոնական Բաքուն այսօր դժգոհել էր, որ Հայաստանը զենք է գնում Ֆրանսիայից ադրբեջանական ագրեսիաներից պաշտպանվելու համար, և Երևանին մեղադրել «ռազմականացման» քաղաքականության մեջ, մինչդեռ Ադրբեջանն ինքն է ակտիվորեն շարունակում զինվել ժամանակակից սպառազինությամբ։
Էմմա Չոբանյան
