23.07.2026 | 23:28
Կապանը` ԱՊՀ 2026 թվականի երիտասարդական մայրաքաղաք
Ադրբեջանն Իսրայելից Barak MX հակահրթիռային համակարգ է ձեռք բերել․ ԶԼՄ-ներ
Քաղաքականություն
15.09.2023 | 19:25
Իսրայելական Israel Aerospace Industries ընկերությունը հաջողությամբ փորձարկել է Barak MX հակահրթիռային պաշտպանության համակարգը։ Ընկերությունը չի հստակեցրել, թե որ երկրում է եղել փորձարկումը, սակայն ենթադրվում է, որ դա տեղի է ունեցել Ադրբեջանում, որտեղ վերջերս ՀՕՊ զորավարժություններ են անցկացվել։ Այս մասին հայտնում են իսրայելական աղբյուրները, որոնց վկայակոչում են ադրբեջանական լրատվամիջոցները։
Օպերատիվ վարժանքը ներառել է ուղիղ կրակի վարժանք, որի ընթացքում բալիստիկ հրթիռ է որսացել։ Barak MX-ը համակարգ է, որն ապահովում է հուսալի պաշտպանություն օդադեսանտային լայն միջոցներից, ներառյալ ինքնաթիռները, ուղղաթիռները, անօդաչու սարքերը և հրթիռները:
Համակարգն ունի ծովային և ցամաքային տարբերակներ, որոնք կարող են աշխատել օր ու գիշեր և եղանակային բոլոր պայմաններում։ Համակարգը կարող է միաժամանակ մի քանի թիրախ որսալ 35-ից 150 կմ հեռավորության վրա։
Ըստ իսրայելական աղբյուրների՝ այս համակարգը կարող է պաշտպանել Ադրբեջանի տարածքը Իրանի հրթիռային սպառնալիքից։
Հավելենք, որ Ադրբեջանում ՀՕՊ զորավարժությունները տեղի են ունեցել սեպտեմբերի 13-ին, որի ընթացքում օգտագործվել է իսրայելական արտադրության Barak-8 ER հակաօդային պաշտպանության համակարգ։
Ադրբեջանն իր զինանոցում վաղուց ունի նաև իսրայելական «Երկաթ գմբեթ» ՀՕՊ համակարգերից։
Էմմա Չոբանյան
