18.12.2025 | 22:49
Համբերությունը սպառվում է. Թուրքիան զգուշացրել է Սիրիայի քրդական ուժերին
Հնդկաստանը դիտարկում է ՀՀ-ին ավելի շատ սպառազինություն մատակարարելու հնարավորությունը․ The Economic Times
Քաղաքականություն
27.10.2023 | 13:24
Հնդկաստանը դիտարկում է Կովկասում իր ռազմավարական դաշնակցին՝ Հայաստանին, ռազմական տեխնիկայի նոր խմբաքանակ մատակարարելու հարցը՝ վերջին տարվա ընթացքում զենքի առաջին խմբաքանակի հաջող մատակարարումից հետո։ Այս մասին գրում է հնդկական The Economic Times-ը։
Իրազեկ աղբյուրները լրատվամիջոցին ասել են, որ վերջերս հայ բարձրաստիճան պաշտոնյա է այցելել Դելի և քննարկումներ անցկացրել այս ուղղությամբ։ Նրանք նշել են, որ Հնդկաստանը դարձել է զենքի վստահելի մատակարար՝ Հայաստանի պահանջներին համապատասխան։
Նոր մատակարարումների վերաբերյալ մանրամասները դեռևս հայտնի չեն, սակայն ըստ դիտորդների՝ խմբաքանակը կարող է ներառել սարքավորումներ, որոնք կօգնեն զսպող միջոցներ ստեղծել Ադրբեջանի հետ կոնֆլիկտային իրավիճակի ֆոնին։
Ըստ լրատվամիջոցի՝ Հնդկաստանի կողմից Հայաստան ուղարկված վերջին խմբաքանակը ներառում էր Pinaka հրթիռային կայանքներ, հակատանկային հրթիռներ և զինամթերք։ Հաղորդվում է, որ զենքի մատակարարումն իրականացվել է Իրանի միջոցով, որը պատմական կապեր ունի Հայաստանի հետ: Ադրբեջանն էլ բողոք էր հայտնել այդ մատակարարումներից հետո։
Այս տարվա սկզբին Հնդկաստանը, Իրանը և Հայաստանը եռակողմ ձևաչափ էին ստեղծել՝ տրանսպորտային միջանցքը ուսումնասիրելու համար։ Ապրիլին Երևանում կայացած հանդիպման ժամանակ երեք կողմերը քննարկել էին տնտեսական նախագծերը և տարածաշրջանային հաղորդակցության ուղիները, նախանշել մշակութային և մարդկանց միջև կապերի խորացման հեռանկարները, ինչպես նաև եռակողմ համագործակցությունը տարբեր ոլորտներում։ Նրանք այն ժամանակ որոշել էին «շարունակել խորհրդակցությունները» նույն ձևաչափով։ Եռակողմ հանդիպման ժամանակ քննարկվել էր նաև Հյուսիս-Հարավ միջազգային տրանսպորտային միջանցքի օգտագործումը՝ որպես տարածաշրջանային կապի նախաձեռնություն:
Նշվում է, որ Ադրբեջանի կողմից անօդաչու թռչող սարքերի օգտագործումը հիմնական պատճառն է, թե ինչու է Հայաստանը գնում Pinaka կայանքները, քանի որ դրանք հնարավորություն ունեն խուսանավել հակամարտկոցային կրակի դեպքում: Միաժամանակ, ցածր արժեքը և օգտագործման պարզությունն դրանք դարձնում են կատարյալ սպառազինության համակարգ Հայաստանի համար: Ըստ պարբերականի՝ հայկական բանակը հեշտությամբ կարող է հարմարվել այդ համակարգերին, քանի որ սովոր է օգտագործել ռուսական արտադրության «Գրադ» համակարգը։
«Հայաստան բերված նոր զինատեսակները ներկայում փորձարկվում են հայ զինվորականների կողմից, և արդյունքները «շատ գոհացուցիչ են»։ Այս մասին էլ օրերս հայտարարել էր Հայաստանի պաշտպանության և անվտանգության հարցերի խորհրդարանական հանձնաժողովի նախագահ Անդրանիկ Քոչարյանը՝ չնշելով Հնդկաստանի մասին»,- գրում է The Economic Times-ը։
Էմմա Չոբանյան
