06.06.2026 | 19:05
Բիթքոյնը կորցնում է գրավչությունը․ ներդրողները նախընտրում են AI ընկերություններն ու խոշոր IPO-ները
Ֆրանսիայի մշակույթի նախարարի հայտարարությունները դժգոհություն են առաջացրել Բաքվում
Քաղաքականություն
27.10.2023 | 12:08
Երևանում Ֆրանսիայի մշակույթի նախարար Ռիմա Աբդուլ Մալակի հայտարարություններն Արցախի վերաբերյալ դժգոհություն են առաջացրել Բաքվում։ Ադրբեջանի ԱԳՆ մամուլի խոսնակ Այխան Հաջիզադեն ասել է, թե նախարարի հայտարարությունները Ղարաբաղի մշակութային ժառանգության մասին ֆրանսիական կողմի «թուլության և կողմնակալության օրինակ են»։
«Ադրբեջանը քաջ գիտակցում է իր տարածքում գտնվող բոլոր մշակութային և պատմական հուշարձանների պաշտպանության կարևորությունը և, մասնավորապես, իր պարտավորությունները այս համատեքստում: Ֆրանսիան, լինելով այլ ժողովուրդներին պատկանող պատմամշակութային արժեքները բռնագրաված երկիր, բարոյական իրավունք չունի նման հարցեր բարձրացնելու»,-ասել է Հաջիզադեն՝ հայտարարելով, թե մշակութային և պատմական հուշարձանների՝ վտանգի տակ լինելու պնդումները «անհիմն են»։
Բաքվի այս պնդումները վստահություն չեն ներշնչում, եթե հաշվի առնենք այն, որ 2020 թ-ի 44-օրյա պատերազմից հետո ամեն կերպ խոչընդոտում են ՅՈՒՆԵՍԿՕ-ի առաքելության մուտքն Արցախ։
Հիշեցնենք, որ նախօրեին անդրադառնալով Լեռնային Ղարաբաղում գտնվող հայկական պատմամշակութային ժառանգության պաշտպանության հարցին՝ Ֆրանսիայի մշակույթի նախարար Ռիմա Աբդուլ Մալակը նշել էր, որ հարցը միջազգային հարթակներում բարձրաձայնելու համար ֆրանսիական կողմը պատրաստ է ներդնել առավելագույն ջանքեր:
Նախարարը նշել էր, որ իրենք պաշտոնապես դիմել են ՅՈՒՆԵՍԿՕ-ին, որպեսզի վերջինս թույլտվություն ստանա Լեռնային Ղարաբաղ այցելելու և արձանագրելու բոլոր պատմամշակութային հուշարձանները դրանք նույնականացնելու համար:
Էմմա Չոբանյան
