Արագ արձագանքման բժշկական թիմ կստեղծվի․ նախագիծ

Հայաստանի Հանրապետության առողջապահության նախարարության «Սուրբ Գրիգոր Լուսավորիչ» բժշկական կենտրոնի հենքի վրա բժշկական կենտրոնի բուժաշխատողների և ՀՀ ներքին գործերի նախարարության փրկարար ծառայության մասնագետների ներգրավմամբ ստեղծվում է Հայաստանյան արագ արձագանքման բժշկական թիմ (այսուհետ՝ ՀԱԱԲԹ)։ Առողջապահության նախարարությունը այս առնչությամբ նախագիծ է մշակել, որը հանրային քննարկման է դրված е-draft հարթակում։

Նախագծում նշվում է, որ ՀԱԱԲԹ-ն ստեղծվում է Հայաստանի տարածքում արտակարգ իրավիճակների ժամանակ և Հայաստանի տարածքից դուրս միջազգային մարդասիրական առաքելությունների շրջանակներում տուժածներին բժշկական օգնություն և սպասարկում տրամադրելու նպատակով: Նոր կազմավորվող բժշկական թիմը ՀՀ տարածքից դուրս միջազգային մարդասիրական առաքելությունների շրջանակներում տուժածներին բժշկական օգնություն և սպասարկում տրամադրելու աշխատանքներին ներգրավվում է վարչապետի որոշմամբ` ՀՀ կառավարության սահմանած կարգով:

Նախագծի հիմնավորման մեջ նշվում է, որ ՀՀ արտակարգ իրավիճակների առումով բարձր ռիսկային երկիր է։ Երկրում արտակարգ իրավիճակների առաջացման հնարավոր պատճառներից կարելի է առանձնացնել երկրաշարժերը, զինված հակամարտությունները և համաճարակային ներուժ ունեցող մի շարք վարակիչ հիվանդությունները, որոնք կարող են անմիջական հետևանք ունենալ բնակչության առողջության վրա:

«Գիտակցելով երկրի և տարածաշրջանի մակարդակով բնակչության առողջության վրա անմիջական հետևանքներ առաջացնող արտակարգ իրավիճակներին արագ արձագանքելու որակյալ բժշկական ներուժի ստեղծման կարևորությունը և դերը` Հայաստանի Հանրապետության կառավարությունն իր 2021-2026թթ. գործունեության միջոցառումների ծրագրով ստանձնել է միջազգային հավաստագրում ունեցող արագ արձագանքման բժշկական թիմ ստեղծելու պարտավորությունը: Հայաստանյան արագ արձագանքման բժշկական թիմը (ՀԱԱԲԹ) միջազգային մարդասիրական առաքելություններին կարող է մասնակցել Առողջապահության համաշխարհային կազմակերպության կողմից միջազգային հավաստագրում (դասակարգում) ստանալուց հետո», – գրված է հիմնավորման մեջ:

Նախագծի ընդունման կապակցությամբ պետական բյուջեում լրացուցիչ ֆինանսական միջոցների անհրաժեշտություն չի առաջանում, քանի որ Հայաստանյան արագ արձագանքման բժշկական թիմ ստեղծելու և այն միջազգային հավաստագրման (դասակարգման) ներկայացնելու համար անհրաժեշտ ֆինանսավորումն առավելապես իրականացվելու է Եվրոպական բնակչության պաշտպանության և հումանիտար օգնության գործառնությունների գլխավոր տնօրինության (DG ECHO) կողմից:

Նախագծի ընդունման արդյունքում Հայաստանում կստեղծվի ՀԱԱԲԹ, կսահմանվի վերջինիս կազմը, ինչպես նաև բժշկական թիմի գործունեությունը ծավալելու համար անհրաժեշտ դեղերի, բժշկական նշանակության ապրանքների, բժշկական սարքավորումների (պարագաների) և նյութատեխնիկական միջոցների նախնական ցանկը, ինչն անհրաժեշտ պայման է ՀԱԱԲԹ-ն միջազգային հավաստագրման (դասակարգման) ներկայացնելու համար:

Անի Թամրազյան