20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
«Պետպատվերով տեղեր էին պետք». արցախցի ուսանողի համար մինչև 300 հազար դրամ հավելավճարը խնդիր է. ՏԵՍԱՆՅՈՒԹ
Հասարակություն
20.10.2023 | 21:02
Անի Աբրահամյանն Արցախի պետական համալսարանի Իրավագիտության ֆակուլտետի ուսանող է, ասում է՝ չէր էլ կարող պատկերացնել, որ երբևէ Երևանում կշարունակի ուսումը։ Երևանի պետական համալսարանում իրեն ու ընկերներին ջերմ են ընդունել, ու թեև պաշտոնապես դեռևս հրամանագրված չեն որպես ուսանող, մատյաններում իրենց անունները չկան, իրենք էլ են համարվում Իրավագիտության ֆակուլտետի երրորդ կուրսի ուսանողներ։
Անին կեցության խնդիրն արդեն լուծել է, միայն թե ուսման վարձն է բավական բարձր՝ տարեկան 1 միլիոն դրամ։ Ու թեև պետությունը վճարում է 700 հազար դրամ կրթաթոշակ՝ ուսման վարձը մարելու համար, ասում է՝ իր համար 300 հազար դրամ վճարելն էլ ստեղծված իրավիճակում բավական բարդ է։
2023-ի սեպտեմբերի 19-ից հետո Արցախից բռնի տեղահանվել է 4640 ուսանող: Նրանցից 2116-ը սովորել են բուհերում, իսկ 2524-ը՝ նախնական մասնագիտական (արհեստագործական) և միջին մասնագիտական ուսումնական հաստատություններում։ Եվ չնայած ԿԳՄՍ նախարարությունը տեղահանված ուսանողներին վճարում է կրթաթոշակներ՝ ուսման վարձը մարելու համար, Բարձրագույն կրթության և գիտության կոմիտեի հրապարակած ցուցակների համաձայն, որոնք, ի դեպ, նախնական են, հայաստանյան բուհերի առկա ուսուցմամբ 43 և հեռակա ուսուցմամբ 44 մասնագիտությունների գծով Արցախից բռնի տեղահանված ուսանողները, կրթաթոշակ ստանալուց զատ, ստիպված կլինեն իրենք հավելավճարներ անել:
«Մենք ունենք 1050 դիտում, իհարկե, որոշակի տեղաշարժ լինում է՝ կախված կրթական ծրագրերի փոխհատուցման չափից։ Ուսանողները դիմումները երբեմն տեղափոխում են այլ բուհեր, հիմա ԵՊՀ-ն բուռն քննարկման մեջ է Ֆինանսական վերլուծությունների վարչության հետ»,- Factor TV-ի հետ զրույցում ասաց ԵՊՀ Ուսումնամեթոդական վարչության կազմակերպչական բաժնի վարիչ Մարգարիտ Ներսիսյանը։
Մի քանի տասնյակ կրթական ծրագրերի գծով հավելավճարները, իհարկե, չնչին են, բայց դրան զուգահեռ՝ քիչ չեն կրթական ծրագրերը, որոնց դեպքում հավելավճարները բավական մեծ գումար են կազմում։ Օրինակ՝ Երևանի պետական համալսարանի «Տնտեսագիտություն» կրթական ծրագրի պարագայում ուսման վարձը կազմում է 850 հազար դրամ, կրթաթոշակը՝ 533 հազար դրամ, ուստի հավելավճարը կազմում է 317 հազար դրամ:
Ինչ վերաբերում է հեռակա ուսուցմանը, օրինակ՝ Մանկավարժական համալսարանի «Տարրական մանկավարժություն և մեթոդիկա» մասնագիտության համար ուսման վարձը 570 հազար է, կրթաթոշակը` 387 հազար․ հավելավճարն այս դեպքում կազմում է 183 հազար դրամ:
Մանրամասները՝ տեսանյութում։
Աննա Բաբաջանյան
