24.07.2026 | 12:10
ՌԴ-ն հուլիսի 27-ից կարգելի Հայաստանից կաթնամթերքի ներմուծումը // Ծառուկյանին կրկին հարցաքննում են․ ԼՈՒՐԵՐ
Ռուսաստանը ծրագրում է Աբխազիայում ռազմածովային բազա ստեղծել
Քաղաքականություն
05.10.2023 | 22:29
Ռուսաստանը պայմանագիր է ստորագրել Վրաստանից անջատված Աբխազիայի սևծովյան ափին մշտական ռազմածովային բազա ստեղծելու մասին: Այս մասին հայտնել է Աբխազիայի ղեկավարը, գրում է BBC-ի ռուսական ծառայությունը։
«Մենք համաձայնագիր ենք ստորագրել, և մոտ ապագայում Օչամչիրայի շրջանում ռազմածովային նավատորմի համար մշտական բազա կլինի»,- ասել է Ասլան Բժանիան։
Նրա խոսքով՝ դա կբարձրացնի ինչպես Ռուսաստանի, այնպես էլ Աբխազիայի պաշտպանունակությունը։
Ռուսաստանի Սևծովյան նավատորմը, որը տեղակայված է Սևաստոպոլում (Մոսկվան Ղրիմի հետ միասին բռնակցել է 2014 թվականին), ենթարկվել է ուկրաինական զորքերի բազմակի հարձակման 2022 թվականին Ուկրաինա ռուսական լայնամասշտաբ ներխուժման սկզբից ի վեր:
Ռուսաստանը ճանաչել է Աբխազիայի և Վրաստանի մեկ այլ անջատված տարածաշրջանի՝ Հարավային Օսիայի անկախությունը 2008 թվականի օգոստոսյան պատերազմից հետո։ Արևմուտքը մեղադրում է Ռուսաստանին Աբխազիայի և Հարավային Օսիայի բռնակցման մեջ, և երբ 2009-ին խոսվեց Օչամչիրայում ռուսական բազայի մասին, ՆԱՏՕ-ն իր անհանգստությունը հայտնեց, գրում է Reuters-ը։
Օչամչիրայում ռուսական բազայի մասին լուրերը, որտեղ խորհրդային տարիներին գտնվում էր խորհրդային ռազմածովային բազան, կարող են վկայել, որ Ռուսաստանն այլընտրանք է փնտրում Սևաստոպոլին, ինչպես նաև ընդլայնում է իր ռազմական ներկայությունը Սև ծովի ափի երկայնքով դեպի Թուրքիա, մեկնաբանում է Reuters-ը։
The Wall Street Journal-ն էլ նախօրեին գրել էր, որ ուկրաինական հարձակումների պատճառով Ռուսաստանը դուրս է բերել իր Սևծովյան նավատորմի մեծ մասը Ղրիմում գտնվող հիմնական բազայից:
Չորեքշաբթի Բժանիայի հետ հանդիպմանը ՌԴ նախագահ Վլադիմիր Պուտինը ոչինչ չի ասել ռազմածովային բազայի մասին։ Սակայն Բժանիան ասել է, որ ցանկանում է մասնակցել «ռուսական կողմի նախաձեռնած ինտեգրացիոն գործընթացներին»։
