15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ադրբեջանին վաղ թե ուշ մեղադրելու են էթնիկ զտումների մեջ․ Բաքվում անհանգստացած են
Քաղաքականություն
02.10.2023 | 22:58
Ադրբեջանական պետական քարոզչամեքենան փորձում է ամեն ջանք գործադրել Արցախի դեմ սեփական ագրեսիան արդարացնելու և Արցախում իրականացված էթնիկ զտումները քողարկելու համար։ Չնայած փաստերին՝ պաշտոնական Բաքուն հայտարարում է, որ որևէ բռնի տեղահանություն և էթնիկ զտում չի իրականացնում։ Այնումենայնիվ, Բաքվում նկատվում է անհանգստություն, որ հայերը բռնի տեղահանվել են Արցախից, և կան որոշակի քննարկումներ Ադրբեջանի համար այդ ամենի բացասական հետևանքների։
Մասնավորապես, իրենց ընդդիմադիր համարող որոշ ադրբեջանական լրատվականներ գրում են, որ Ադրբեջանին վաղ թե ուշ մեղադրելու են էթնիկ զտումների մեջ։
Ադրբեջանցի իրավապաշտպան Արզու Աբդուլաևան էլ չի կասկածում, որ սկսված գործընթացը կշրջվի Ադրբեջանի դեմ։
«Մարդու իրավունքների նկատմամբ Ադրբեջանի կառավարության վերաբերմունքը նվազեցնում է վստահությունը նրա հանդեպ։ Բացահայտ ասում են՝ եթե չես կարողանում ապահովել քո սեփական քաղաքացիների իրավունքները, ինչպե՞ս կվարվես այլ ազգերի հետ»,- ասել է Աբդուլաևան։
Նա նշել է, որ կառավարությունը պետք է լուրջ փոփոխություններ կատարի մարդու իրավունքների հետ կապված իրավիճակում, քանի որ այդ ուղղությամբ քայլերը դրական իմիջ կբերեն նաև Ղարաբաղի հարցում։ Աբդուլաևան ասել է, թե հայերի «ինտերգրման» հետ կապված կառավարության համար առաջարկներ են պատրաստել։
«Մասնավորապես, Ռուսաստանի ծրագրերը խանգարել են խաղաղ գործընթացին։ Ի՞նչ եղավ արդյունքում, Ադրբեջանը դարձավ դատապարտման առարկա։ Բայց չնայած այս ամենին, որպեսզի զոհերը շատ բարձր չլինեն, ստեղծվեց հանձնաժողով՝ Շահին Մուստաֆաևի նախագահությամբ։ Եթե հանձնաժողովն աշխատեր քաղաքացիական հասարակության հետ, մյուս կողմն ավելի մեծ վստահություն կունենար, և Ադրբեջանը միջազգային կազմակերպությունների թիրախը չէր դառնա»,- ասել է իրավապաշտպանը։
Ըստ նրա՝ Ադրբեջանը պարտվում է տեղեկատվական պատերազմում։
«Խնդիրն այն է, որ Ադրբեջանը վերադարձնում է իր օկուպացված տարածքները, սակայն արտասահմանյան լրատվամիջոցները հայտնում են, որ պաշտոնական Բաքուն էթնիկ զտումներ է իրականացնում և ագրեսիա է ցուցաբերում։ Ուստի ,կառավարությունը պետք է կապ հաստատի քաղաքացիական հասարակության հետ։ Հակառակ դեպքում, հնարավոր չի լինի հասնել խաղաղության ու առաջ գնալ»,- հավելել է Աբդուլաևան։
Ցեղասպանությունն ու էթիկ զտումն իսկապես անհանգստացնում են Բաքվին։ Նաև այդ պատճառով ավելի վաղ Ադրբեջանի իշխանամերձ Միջազգային հարաբերությունների վերլուծության կենտրոնի ղեկավար Ֆարիդ Շաֆիևը հայտարարել էր, թե ռուս խաղաղապահները կմնան Արցախում մինչև 2025 թվականը, քանի որ «մեղադրանքներ կան, որ կարող է լինել ցեղասպանություն»։
Էմմա Չոբանյան
