Քաղաքականություն
22.09.2023 | 21:02Առնվազն 200 զոհի և 400 վիրավորի հանգեցրած սեպտեմբերի 19-ի Ադրբեջանի ռազմական ագրեսիայի հետևանքով Արցախի իշխանությունը համաձայնվեց Եվլախում բանակցել Բաքվի ներկայացուցիչների հետ։ ԼՂ իշխանությունը համաձայնվել է ՊԲ-ն ցրելուն, Ադրբեջանի ինտեգրման ծրագրի քննարկմանը։ Ադրբեջանը հաղորդել էր, որ Եվլախում «քննարկել են վերաինտեգրման, ենթակառուցվածքների վերականգնման, Ադրբեջանի Սահմանադրության ու օրենքների հիման վրա Ղարաբաղի հայ բնակչության գործունեության կազմակերպման վերաբերյալ հարցեր»։
ՀՀ իշխանությունն էլ ասաց, որ սա իրենց հետ չի քննարկվել, փաստաթղթի մշակմանը չեն մասնակցել։ Փաշինյանն ասաց՝ հետևում են իրադարձությունների զարգացմանը։
Այսօր արդեն Ալիևի օգնականը հայտարարել է, թե Բաքուն պատրաստ է ապահովել Ստեփանակերտ-Լաչին ճանապարհով քաղաքացիական անձանց՝ սեփական մեքենաներով տեղաշարժի անվտանգությունը։ Ըստ նրա՝ գնալ ցանկացողները հիմնականում զինվորականների ընտանիքների անդամներ են։ Բաքուն հայտնում է, թե պատրաստ է համաներում հայտարարել նրանց նկատմամբ, ովքեր վայր կդնեն զենքերը։ Նախկին զինվորականների համար Ադրբեջանը դիտարկում է համաներման հնարավորությունը։ Բաքվից նշում են, որ համաձայնել են՝ զենքերը վայր դնողներն ազատ արձակվեն։
Այսօր արդեն Լաչինի միջանցքով անցել են ռուսական խաղաղապահների շարասյուներ, որոնք ուղևորվել են Գորիս՝ սնունդ և անհրաժեշտ իրեր Արցախ տեղափոխելու նպատակով։ Դեռ հայտնի չէ՝ այս բեռներից բաժին կհասնի՞ արցախցիներին, թե՞ խաղաղապահների համար են։
Այս իրադրությանը զուգահեռ՝ Հայաստանի խորհրդարանական ընդդիմությունը բողոքի ակցիաներ է նախաձեռնել իշխանափոխության պահանջով։ Ինչպիսի՞ն է իրադրությունը, և ինչպիսի՞ զարգացումներ կարող են տեղի ունենալ։
Factor TV-ի տաղավարում հրավիրված քննարկմանը մասնակցում են Լրագրողներ հանուն մարդու իրավունքների ՀԿ ղեկավար, իրավապաշտպան Ժաննա Ալեքսանյանը, «Անտարես» մեդիահոլդինգի ղեկավար, հրատարակիչ Արմեն Մարտիրոսյանը, «Միացյալ Հայաստան» կուսակցության փոխնախագահ, աստվածաբան Վարդան Խաչատրյանը, «Ժողովրդավարական հարթակ» հիմնադրամի տնօրեն Գարեգին Միսկարյանը։
