25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Ադրբեջանը մտադիր է Իտալիայից 1-2 միլիարդ եվրոյի զենք գնել
Քաղաքականություն
22.09.2023 | 15:06
Ադրբեջանի իշխանություններն ամիսներ շարունակ բանակցել են Իտալիայի հետ զենքի գնման շուրջ։ Այս մասին գրում է իտալական La Repubblica-ն։
Լրատվամիջոցի տվյալներով Բաքուն ակնկալում է ձեռք բերել ուսումնական ինքնաթիռներ, ինքնաձիգներ, զենիթային համակարգեր, ռազմատրանսպորտային ինքնաթիռներ, սուզնավեր։ Գործարքի ընդանուր արժեքը գնահատվում է 1-2 միլիարդ եվրո։ Նշվում է, որ բանակցությունները վարել են երկու երկրների պաշտպանության նախարարները։ Լրատվամիջոցը, սակայն, նշում է, որ Ղարաբաղում վերջին իրադարձությունները հիմա խնդիր են Իտալիայի կառավարության համար։
Բոլոր պայմանագրերը դեռ արգելափակված են UAMA-ի հատուկ գերատեսչության թույլտվության բացակայության պատճառով, որը վերահսկում է իտալական զենքի մատակարարման թույլտվությունների տրամադրումը։ 1992 թ-ի կանոնների համաձայն՝ զենքը չի կարող վաճառվել երկրի, որը գտնվում է հակամարտության մեջ։ Ըստ լրատվամիջոցի՝ դրա հետ կապված Բաքուն սկսել է այլընտրանքային արտադրողների փնտրել Թուրքիայում և Իսրայելում։
Ինչպես նշում է La Repubblica-ն, մտավախություն կա, որ իրավիճակը կարող է բացասաբար ազդել Հռոմի հետ հարաբերությունների կարևորագույն ասպեկտի վրա՝ գազի մատակարարումների, որոնց միջոցով Իտալիան մտադիր է փոխհատուցել Ռուսաստանից մատակարարումների կրճատումը։
Factor TV-ն ավելի վաղ անդրադարձել է Իտալիայի ու Ադրբեջանի միջև ռազմական կապերի ինտենսիվացմանը, երկու երկրների ՊՆ պատվիրակությունների փոխայցերին։ Հունիսին էլ իտալական Leonardo կոնցեռնը հայտարարել էր Ադրբեջանի ռազմաօդային ուժերի համար C-27J տրանսպորտային ինքնաթիռների մատակարարման պայմանագրի կնքման մասին։ Ստորագրման արարողությանը մասնակցել էին երկու երկրների ՊՆ ներկայացուցիչները։
«Ի սկզբանե, էներգետիկ ոլորտի հետ կապված Իտալիայի և Ադրբեջանի համագործակցությունն այժմ տարածվում է պաշտպանական արդյունաբերության արտադրանքի վրա՝ Իտալիայի պաշտպանության նախարարության աշխատանքային խմբի արժեքավոր ներդրման շնորհիվ: Համաձայնագիրն Ադրբեջանի զինված ուժերի արդիականացման լայնածավալ ծրագրի մի մասն է, որը գնալով ավելի մեծ ուշադրություն է դարձնում իտալական արդյունաբերության արտադրանքին»,- ասվում էր հաղորդագրության մեջ։
