24.11.2024 | 13:40
Օդի ջերմաստիճանը կնվազի 6-10 աստիճանով
Հնդկաստանում սկսել է տարածվել Nipah վիրուսը․ կարանտին և թեստավորում է մտցվել
Քաղաքականություն
19.09.2023 | 23:21
Հնդկաստանի իշխանությունները զանգվածային թեստավորում են մտցրել՝ կանգնեցնելու մահացու Nipah վիրուսի տարածումը, որի հետևանքով Քերալայում զոհվել է հինգ մարդ, այդ թվում՝ մեկ երեխա: Պաշտոնյաները նաև սահմանափակել են հասարակական հավաքները, փակել են դպրոցներն ու գրասենյակները, նաև հրահանգել փողոցները մաքրել հակասեպտիկներով, գրում է Korrespondent-ը:
Nipah-ը հազվագյուտ, բայց լուրջ վիրուս է, որը փոխանցվում է կենդանիներից: Հիվանդությունը կարող է առաջացնել ջերմություն, փսխում և սուր շնչառական ախտանիշներ: Ծանր դեպքերը կարող են ներառել նոպաներ և էնցեֆալիտ՝ ուղեղի բորբոքում, և հանգեցնել կոմայի:
Առողջապահության համաշխարհային կազմակերպության (ԱՀԿ) տվյալներով՝ վիրուսից մահացության մակարդակը կազմում է 40-75%: Մահացության այս բարձր ցուցանիշը պայմանավորված է վարակի դեմ պատվաստանյութի բացակայությամբ, իսկ հիվանդության ավանդական բուժումը ներառում է միայն աջակցող թերապիա:
Nipah-ի առաջին բռնկումը գրանցվել է 1998 թվականին՝ այն բանից հետո, երբ վիրուսը տարածվեց Մալայզիայի և Սինգապուրի խոզաբուծական ֆերմերների շրջանում: Վիրուսը ստացել է այն գյուղի անունը, որտեղ այն հայտնաբերվել է։
Վիրուսակիր են համարվում չղջիկները, թռչող շները և թռչող աղվեսները: Մարդը կարող է վարակվել անմիջապես այդ կենդանիներից կամ, օրինակ, ուտելով մրգեր, որոնց հետ այդ կենդանիները շփվել են։ Վարակը կարող է տարածվել նաև հիվանդ մարդուց։
