16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
905 մլն դրամ՝ «Մարգարա» մաքսակետի կառուցման համար․ երբ կգործի այն՝ հայտնի չէ
26.08.2023 | 10:45
ՀՀ կառավարությունը հայ-թուրքական սահմանի «Մարգարա» մաքսային կետի կառուցման ու կահավորման նպատակով հատկացրել է 905․3 մլն դրամ՝ մոտ 172 մլն դրամով ավելի, քան նախապես հայտարարվել էր։
Պետական գնումների էլեկտրոնային համակարգից տեղեկանում ենք, որ օգոստոսի 17-ին Պետական եկամուտների կոմիտեն նոր պայմանագիր է կնքել «ԱՐՏԿՈՆ» ՓԲ ընկերության հետ՝ «Մարգարա» մաքսային կետի կառուցման 2-րդ փուլի աշխատանքների իրականացման համար։ Այս պայմանագրով պետությունը կառուցապատողին վճարել է 620․8 մլն դրամ։ Մաքսակետի կառուցման 1-ին փուլի աշխատանքները ևս իրականացրել է «ԱՐՏԿՈՆ»-ը՝ 250․6 մլն դրամով։
Մաքսակետի կառուցման 2-րդ փուլի նախագծանախահաշվային փաստաթղթերի քաղաքաշինական պարզ փորձաքննությունն իրականացրել է «ԱՍ նախագիծ» ՍՊԸ-ն՝ 1․1 մլն դրամով։ Մաքսակետի կառուցման 1-ին փուլի աշխատանքների կատարման նկատմամբ տեխնիկական հսկողության համար ՊԵԿ-ը պայմանագիր է կնքել «Տամո-Շին» ՍՊԸ-ի հետ՝ 3 մլն դրամով, նախագծանախահաշվային փաստաթղթերը կազմել և հեղինակային հսկողություն է իրականացնում «Արբակ և որդիներ» ՍՊԸ-ն՝ 29․8 մլն դրամով։
«Մարգարա» մաքսակետը պետք է արդեն այս ամռանը սպասարկեր հայ-թուրքական սահմանը հատող երրորդ երկրների քաղաքացիների և դիվանագիտական անձնագիր ունեցող անձանց։ Դեռ 1 ամիս առաջ ԱԺ փոխնախագահ Ռուբեն Ռուբինյանը հայտարարել էր, որ թուրքական կողմը նույնպես պատրաստվում է դրան, և պայմանավորվածությունն ուժի մեջ է։
Մինչդեռ Թուրքիան Հայաստանի հետ սահմանի բացումը շարունակում է պայմանավորել Հայաստան-Ադրբեջան հարաբերություններով, մասնավորապես՝ խաղաղության պայմանագրի ստորագրմամբ, իսկ թե երբ կարող է տեղի ունենալ փաստաթղթի ստորագրումը, հայտնի չէ։
Գայանե Խաչատրյան
