14.10.2026 | 14:53
Բաքուն Իրանին և Թուրքիային մեղադրում է Ադրբեջանի դեմ տեղեկատվական հարձակումների մեջ
Ընտանիքում բռնության ենթարկված անձանց ֆինանսական աջակցության տրամադրման առաջարկներ են ներկայացվել
Տնտեսություն
13.07.2018 | 11:15
ՀՀ աշխատանքի եւ սոցիալական հարցերի նախարար Մանե Թանդիլյանը Facebook-ի իր էջում գրել է.
«Կառավարության կողմից հաստատվել է «Ընտանիքում բռնության կանխարգելման խորհուրդ ստեղծելու, խորհրդի ձեւավորման կարգը եւ գործառույթները հաստատելու մասին» ՀՀ կառավարության որոշման նախագիծը։ Նախագծով կարգավորվում են ընտանիքում բռնության կանխարգելման խորհրդի ձեւավորման եւ գործառույթների իրականացմանն ուղղված`հարաբերությունները: Առաջարկվում է Լիազոր մարմնին կից ստեղծել 25 անդամից բաղկացած խորհուրդ, որի կազմում հավասար թվով կընդգրկվեն հանրապետական գործադիր եւ իրավապահ մարմինների, հասարակական կազմակերպությունների եւ օրենքով սահմանված հատուկ կառույցների՝ աջակցության կենտրոնների եւ ապաստարանների ներկայացուցիչներ: Խորհուրդը կգործի հասարակական հիմունքներով, կազմում կընդգրկվի նաեւ Մարդու իրավունքների պաշտպանի աշխատակազմի մեկ ներկայացուցիչ:
Իր գործունեության շրջանակում Խորհուրդը ընտանիքում բռնության կանխարգելման բնագավառում պետական ռազմավարության, դրանից բխող ծրագրերի, օրենսդրական բարեփոխումների, ընտանիքում բռնության ենթարկված անձանց աջակցության, պաշտպանության, ընտանիքում համերաշխության վերականգնման մեխանիզմների, հանրության իրազեկման միջոցառումների եւ այլ հարցերի վերաբերյալ առաջարկությունների ներկայացնելու հնարավորություն կունենա:
Նախատեսվում է խորհրդի կազմում ձեւավորել նաեւ ընտանիքում բռնության ենթարկված անձանց ֆինանսական աջակցության տրամադրման հարցերով զբաղվող բազմամասնագիտական խումբ, որը կքննարկի եւ խորհրդի նախագահին կներկայացնի ընտանիքում բռնության ենթարկված անձանց ֆինանսական աջակցության տրամադրման առաջարկներ:
Խորհուրդը կարող է դառնալ արդյունավետ մեխանիզմ, որը կաջակցի ոլորտում իրականացվող պետական քաղաքականության մշակման եւ դրա իրականացման գործընթացների համակարգմանը, կապահովի պետական մարմինների եւ քաղաքացիական հասարակության միջեւ կապն ու համագործակցությունը»:
