17.02.2026 | 13:31
Առաջին անգամ մայր և որդի մասնացել են ձմեռային Օլիմպիական խաղերին
Բա՛վ է արցախցու կյանքի հաշվին ՌԴ-Արևմուտք հակամարտության վարումը․ Արցախում համաժողովրդական շարժում է սկսվել․ ՏԵՍԱՆՅՈՒԹ
Քաղաքականություն
14.07.2023 | 21:32
Ստեփանակերտի Վերածննդի հրապարակում վաղ առավոտից մեկնարկեց համաժողովրդական շարժումը։ Արցախցիներին փողոց դուրս գալու կոչ երեկ հղել էր պետնախարար Գուրգեն Ներսիսյանը՝ «միասին որոշելու հետագա անելիքները»:
Այսօր արցախահայերի բազմահազարանոց ակցիայի մասնակիցների թվում էին նաև նախագահ Արայիկ Հարությունյանը, նախկին պետական նախարար Ռուբեն Վարդանյանը, որոնք, սակայն, ամբողջ հավաքի ընթացքում այդպես էլ ելույթ չունեցան։ Փոխարենը հարթակ բարձրացավ Արցախի մարդու իրավունքների պաշտպան Գեղամ Ստեփանյանը՝ դիմելով միջազգային հանրությանը։ Նա հիշեցրեց 2020 թվականի նոյեմբերի 9-ի եռակողմ հայտարարությունը՝ ռուս խաղաղապահներին կոչ անելով կատարել պարտականությունները։
Պետնախարար Գուրգեն Ներսիսյանը նկարագրել է այս պահի ծանր դրությունը՝ կրկին կոչով դիմելով ինչպես Ռուսաստանին և միջազգային հանրությանը, այնպես էլ Հայաստանին։
Նույն ընթացքում Հայաստանում խորհրդարանական իշխանական պատգամավորները կրկին մտահոգություններ հայտնեցի Արցախի հումանիտար ճգնաժամի հետ կապված։
Factor TV-ի դիտարկմանը, թե ինչ կարճաժամկետ անելիքներ պետք է ՀՀ-ն ձեռնարկի՝ առաջացած հիմնախնդիրներն արագ լուծելու համար, ՔՊ-ական մեկ այլ պատգամավոր՝ Արթուր Հովհաննիսյանը պատասխանեց, որ իրենք ամենօրյա աշխատանք են անում այդ ուղղությամբ։
Քաղաքագետ Արա Պապյանը նկատում է՝ Արցախը հստակ ուղերձով այդպես էլ չդիմեց Հայաստանին, ինչը դժվարացնում է կոնկրետ գործողությունների դիմելու գործընթացը։ Քաղաքագետի դիտարկմամբ՝ հանրահավաքն ավելի շատ իշխանությունների կողմից արցախահայերի լարվածությունը թեթևացնելու միջոց էր։
Վերածննդի հրապարակում ելույթներից հետո ցուցարարները երթով շարժվել են դեպի Կարմիր խաչի Ստեփանակերտի գրասենյակ, ապա՝ ռուսական խաղաղապահ զորակազմի զորակայան, որտեղ վրաններ են տեղադրել։ Ավելի ուշ պետնախարար Գուրգեն Ներսիսյանը հանդիպել է ՌԴ խաղաղապահ զորակազմի հրամանատար Ալեքսանդր Լենցովի հետ։ «Պարտավորվել և ընդունել են, որ իրենք աշխատանք ունեն անելու` հումանիտար ճգնաժամը վերացնելու համար»,- հանդիպման արդյունքներն է ներկայացրել Գուրգեն Ներսիսյանը։
Իր հերթին, Արցախի նախագահ Արայիկ Հարությունյանն ահազանգ-նամակներով դիմել է միջազգային կառույցների ղեկավարներին, ինչպես նաև Հայաստանի վարչապետին՝ «պահանջելով ստանձնած միջազգային պարտավորությունների շրջանակներում կիրառել հրատապ ու գործուն քայլեր՝ դադարեցնելու Ադրբեջանի կողմից իրականացվող Արցախի ապօրինի ու լիակատար շրջափակումը և կասեցնելու Արցախի ժողովրդի դեմ համակարգված կերպով իրագործվող զանգվածային հանցագործությունները և ահաբեկչությունը»։
Մանրամասները՝ տեսանյութում։
Ռոզա Վարդանյան
