Քաղաքականություն
14.07.2023 | 13:54Կանադայի Վանկուվեր քաղաքում կայացել է ԵԱՀԿ ԽՎ տարեկան նստաշրջանը: Հուլիսի 14-ին կայացած մամուլի ասուլիսի ընթացքում կառույցում ԱԺ պատվիրակության ղեկավար Սարգիս Խանդանյանը, պատվիրակության անդամներ Արթուր Հովհաննիսյանը, Մարիա Կարապետյանը եւ Լիլիթ Մինասյանը մանրամասներ ներկայացրին նստաշրջանի աշխատանքի վերաբերյալ։
Այնուհետև պատասխանելով լրագրողների հարցերին՝ պատգամավորներն անդրադարձան նաև ՀՀ նախկին արտգործնախարար Վարդան Օսկանյանի՝ հուլիսի 4-ին արված հայտարարությանը, որով հանդես էր եկել առաջարկությամբ`եթե իրեն և մի խումբ դիվանագետների հնարավորություն տրվի մտնել բանակցությունների մեջ, կկարողանան 2-3 ամսում կտրուկ փոփոխություն մտցնել բանակցային գործընթացում և այն դարձնել շատ ավելի հայանպաստ։ Բայց կար նախապայման` վարչապետ Նիկոլ Փաշինյանը այդ ընթացքում 2-3 ամիս չպետք է խոսի։
Սարգիս Խանդանյանն Օսկանյանի առաջարկը որակեց որպես էկզոտիկ գաղափար և հավելեց․ «ՀՀ-ում նման ֆորմատներ չկան, կա Սահմանադրություն․․․ ՀՀ-ն ունի խորհրդարան, կա վարչապետ, արտգործնախարար, դիվանագիտական կորպուս, որոնք բանակցում են»։
Լիլիթ Մինասյանը նշեց, որ հավատում է՝ պարոն Օսկանյանը անկեղծ մղումներով ուզում է իր բանակցային փորձը փոխանցել․ «Եթե ունի խորհուրդներ, որոնք լեգիտիմ կարող են լինել, բաց են արտգործնախարարության և կառավարության դռները։
Պարոն Օսկանյանն այս անգամ բացում է փակագծերը՝ ասելով, որ ուզում է բանակցությունների գործընթացում ներառվի ինքնավար մարզի գաղափարը։ Հարց ունեմ՝ ինքնավար մարզ ո՞ր պետության շրջանակում նկատի ունի պարոն Օսկանյանը»։
Մանրամասները՝ տեսանյութում։
