«Վրեժխնդրության որևէ դրսևորում չի եղել, մեկը մեռել ա՞». ՀՀԿ-ական Միհրան Հակոբյանը՝ «Սասնա ծռերի» հանդեպ բռնությունների մասին

ՀՀԿ համամասնական ցուցակով պատգամավոր դարձած Միհրան Հակոբյանը, ով անցյալ տարի ՊՊԾ գնդի գրավման ժամանակ ֆեյսբուքյան օգտատերերի ուշադրության կենտրոնում հայտնվեց Սասնա ծռերի առթիվ «սատկացնելու ժամանակը» գրառումից հետո, factor.am-ի հետ զրույցում ասում է, որ այսօր էլ չի ափսոսում գրառման համար. «Ես ափսոսելու ոչինչ չունեմ դրա համար»:

Դատարանում Սասնա ծռերի անդամների հանդեպ բռնությունների մասին հարցին ՀՀԿ –ական պատգամավորը հակադարձում է. «Իսկ ի՞նչ եք կարծում, ոստիկանությունը պետք է թիթե՞ռ նկարի, թե՞ պետք է կարգը պահի»:

Ըստ Միհրան Հակոբյանի՝ եթե ոստիկանությունը հայտարարում է, որ կարգ պահելու համար համաչափ ուժ է կիրառում, դա արադարացված է:

«Իսկ ո՞վ է ասում՝ 15 հոգով ծեծել են, կա՞ փաստ»,-հարցադրում է անում պատգամավորը: Միևնույն ժամանակ ՀՀԿ-ականը պնդում է, որ ինքը դեմ է բռնությանը և Սասնա ծռերի հանդեպ անձնական վրեժխնդրություն չկա: «Վրժեխնդրության որևէ դրսևորում մեկ տարվա ընթացքում չի եղել, եկեք ճշմարիտ նայենք հա, մեկը մեռել ա՞, մեկը մահացել ա նրանցից: Ասեք մի դեպք, որ մեկը մահացել ա նրանցից: Այ էդ ժամանակ հնարավոր կլիներ խոսել վրեժխնդրությունից կամ այլ երևույթներից»-պնդում է Հակոբյանը:

Հիշեցնենք`մեկ տարի առաջ Սերժ Սարգսյանը խոստացավ, որ հանձնվելու դեպքում զինված խմբի անդամների հանդեպ անձնական վրեժխնդրություն չի լինելու: Երիտասարդ ՀՀԿ-ական պատգամավորը չի ծառայել հայոց բանակում, քանի որ գերադասել է շարունակել ուսումը ասպիրանտուրայում: Նա հերոս չի համարում ՊՊԾ գունդը գրաված Ժիրայր Սեֆիլյանին, Արայիկ Խանդոյանին, Պավլիկ Մանուկյանին ու մյուսներին:

Մանրամասները դիտեք factor.am-ի հետ ՀՀԿ պատգամավոր Միհրան Հակոբյանի հարցազրույցում:

Մարինե Խառատյան