14.10.2026 | 16:15
«Ռուսական երկաթուղիներ»-ը բաց է Հայաստանի հետ կոնցեսիոն պայմանագրի արդյունավետության համատեղ գնահատման համար
Մարդու հիմնական իրավունքները դատարանների կողմից լիարժեք չեն երաշխավորվում. Պաշտպանի ինստիտուտն ու ԲԴԽ-ն կհամատեղեն ջանքերը
Հասարակություն
03.07.2018 | 10:50
ՀՀ մարդու իրավունքների պաշտպան Արման Թաթոյանն աշխատանքային հանդիպում է ունեցել Բարձրագույն դատական խորհրդի նախագահ Գագիկ Հարությունյանի հետ: Քննարկվել են արդարադատությունն ու դատական համակարգն անձանց առավել մատչելի դարձնելու հետ կապված խնդիրները:
Մարդու և քաղաքացու հիմնական իրավունքներն ու ազատություններն անմիջականորեն գործող իրավունք են. սահմանադրական այս դրույթը պետք է լիարժեք կիրառություն ստանա իրական կյանքում: Սրա երաշխավորն առաջնահերթ պետք է լինի դատարանը: Մինչդեռ, այս առումով դատական համակարգում առկա են հրատապ լուծում պահանջող խնդիրներ:
Պաշտպանին հասցեագրված բողոքները վկայում են, որ առկա է դատարանի՝ իբրև անձի իրավունքների արդյունավետ պաշտպանության միջոցի նկատմամբ անվստահությունը վերացնելու անհրաժեշտություն: Կոնկրետ գործերով դատական վարույթներին չմիջամտելու պայմաններում անգամ Մարդու իրավունքների պաշտպանի գործունեությունը վկայում է, որ անձի իրավունքների պաշտպանության խնդիրները շատ դեպքերում պայմանավորված են հենց դատական ընթացակարգերի ոչ բավարար ճկունությամբ:
Բարձրագույն դատական խորհրդի նախագահը, իր հերթին, ընդգծել է արդարադատության նկատմամբ վստահության ձևավորման ու դատական համակարգի ինստիտուցիոնալ բարեփոխման կարևորությունը: Գագիկ Հարությունյանը ներկայացրել է այն նախաձեռնություններն ու ծրագրերը, որոնք ուղղված են դատական համակարգում իրավունքների արդյունավետ երաշխավորմանը:
Հանդիպման ընթացքում անդրադարձ է կատարվել վարչական արդարադատության ոլորտում մարդու իրավունքների լիարժեք երաշխավորման, բանկերի նկատմամբ քաղաքացիների ստանձնած պարտավորությունների չկատարման համար տույժերի ու տուգանքների գանձման և առհասարակ այս ոլորտում անձանց իրավունքների դատական պաշտպանության արդյունավետության հարցերին:
Քննարկման արդյունքներով որոշվել է համատեղել ջանքերը դատական համակարգի կատարելագործման ու արդարադատության մատչելիության ապահովման ուղղությամբ:
