Ջրային պարեկները Սևանում սկուտերներից օգտվողների նկատմամբ ուշադիր կլինեն. ՆԳ փոխնախարար․ ՏԵՍԱՆՅՈՒԹ

ԱԺ նիստում քննարկվում է ««Ոստիկանության մասին» օրենքում լրացում կատարելու մասին» և ««Տեխնիկական անվտանգության ապահովման պետական կարգավորման մասին» օրենքում փոփոխություն կատարելու մասին» օրենքների նախագծերի փաթեթը։
Ներքին գործերի նախարարի տեղակալ Արփինե Սարգսյանի խոսքով՝ Ոստիկանության համար պետք է նախատեսել որոշակի իրավունքներ, որոնք ծառայողները տեղում կկարողանան իրականացնել:

Նախագծերով առաջարկվում են անհրաժեշտ օրենսդրական նախադրյալներ ապահովել Գեղարքունիքի մարզում Ջրային պարեկային ծառայության մասնագիտացված ստորաբաժանման ստեղծման նպատակով, որը կարողանալու է լճի մակերևույթին ու առափնյա հատվածում իրականացնել պարեկային մասնագիտացված ծառայություն: Վերջինս կտարբերվի ցամաքային հատվածում ծառայության իրականացումից:

«Քաղաքացիական պայմանագիր» խմբակցության պատգամավոր Գևորգ Պապոյանը հետաքրքրվեց՝ արդյո՞ք սկուտերների ծառայությունը որևէ կերպ վերահսկվում է, հովեկն այն վարելու համար վարորդական վկայական պետք է ունենա՞, կարգավորում կա՞, թե՝ ոչ:
«Նավավարման իրավունքի վկայականի տրամադրման հետ կապված որոշակի կառուցակարգեր ունենք, բայց դրանք դեռ հեռու են բավարար լինելուց, զարգացած ընթացակարգեր չունենք. հաջորդ քայլը ենթաօրենսդրական դաշտի կարգավորումն է լինելու»,- ի պատասխան պատգամավորի հարցի՝ նշեց փոխնախարարը:

Արփինե Սարգսյանը նշեց նաև, որ Ջրային պարեկային ծառայողները հսկողություն են իրականացնելու բարձրացված հարցի նկատմամբ:
«Շատ են լինում դեպքեր, երբ հովեկները կամ մյուս քաղաքացիները հարբած կամ այլ վիճակում են վարում ջրային տրանսպորտային փոխադրամիջոցները: Սա հասարակական անվտանգության ապահովման լուրջ ռիսկ է իրենից ենթադրում, ինչին պարեկները կկարողանան ցուցաբերել առաջին արձագանքը: Զգույշ ենք մոտենում հարցին, որ զբոսաշրջության մասով խնդիրներ չառաջանան»,- նշեց փոխնախարարը:

Մանրամասները՝ տեսանյութում։