Հաղորդաշարեր
19.05.2023 | 17:02«Շատ հանրահայտ երգիչներ են Կոմիտասի մասին հիմար դատողություններ անում, ինձ զայրացնում է այն, որ Հանրային հեռուստաընկերության եթերում է դա տեղի ունենում, ինչը խիստ անթույլատրելի է: Ես այդ անձնավորությունից պահանջ չունեմ. մեր կրթական ցենզն է ընկած, շատ աշխատանք ունենք տանելու: Հանրայինի պարագայում նման վրիպակ չպետք է լիներ»,- Factor TV-ի հետ զրույցում նման տեսակետ է հայտնում երաժշտագետ, արվեստագիտության թեկնածու Տաթևիկ Շախկուլյանը` անդրադառնալով վերջերս Հանրային հեռուստաընկերության եթերում Սարգիս Բալասանյանի` Սուպեր Սաքոյի կողմից Կոմիտասի մասին կատարած դատողություններին:
Ռեփերը, մասնավորապես, նշել էր. «Կոմիտասը, որ հայկական երաժշտությունը մատուցել է Եվրոպային, եվրոպացիք չեն հասկացել այդ քառորդ նոտաները, ու իրենց տհաճ է թվացել: Իսկ ինքը հայ երգը տարածելու համար հետ է եկել-ասել` չէ, չսիրեցին, բռնեք, ջնջեք: Բոլոր քառորդ նոտաները ջնջել են»:
Մեր զրուցակիցը կտրականապես ժխտում է ռեփերի ասածը` փաստելով, որ նման բան երբևէ տեղի չի ունեցել։
«Կուզեմ ռեփերին հարցնել` պարզ մակարդակում գիտակցո՞ւմ է, թե քառորդ նոտան ինչ է նշանակում: Կոմիտասի կենսագրության մեջ նման դրվագ չկա, հակառակը` Կոմիտասի ներկայացրած երաժշտությունը Եվրոպայում բուռն ընդունելության էր արժանանում, նրան լսում էին զարմացած և բերանները բաց, չի եղել այնպես, որ նրան չհասկանան: Նա երբեք չի ասել` բռնեք, ջնջեք քառորդ նոտաները, այդպիսի բան չի եղել, խայտառակություն է և ամոթ Կոմիտասին նման բառեր վերագրելը»,- ասում է արվեստագետը:
Տաթևիկ Շախկուլյանն անդրադառնում է նաև տվյալ հաղորդման ընթացքում մուղամի վերաբերյալ արված դատողություններին: Նրա խոսքով` մուղամը երբեք չի եղել մեր սեփականությունը. «Մենք դրա կարիքը չենք ունեցել, աբսուրդ է մուղամը մեզ վերագրելը: Կոմիտասը բացահայտել է մեր իրողությունների էությունը, ինչո՞ւ ենք փորձում այլ բան փնտրել»:
Մանրամասները` տեսանյութում:
Աննա Բաբաջանյան
