«Լիդիան Արմենիա» ընկերությունից հերքում են Ամուլսարի ճանապարհին զբոսաշրջիկների մեքենային հարվածելու մասին տեղեկությունը

Ամուլսարի հանքի շահագործման դեմ պայքարող ակտիվիստները քիչ առաջ ֆեյսբուք  սոցցանցի միջոցով տարածեցին տեղեկատվություն այն մասին, որ «Լիդիան Արմենիա» ընկերության աշխատակիցները շշերով հարվածել են Դիլիջանի ճանապարհին կայանված զբոսաշրջիկների մեքենաներին և վնասել նրանցից մեկի դիմապակին։ 

Տեղեկությունը ճշտելու համար  Factor.am-ը կապ հաստատեց «Լիդիան Արմենիա» ընկերության իրավաբան Արմեն Մելքումյանի հետ, ով նշեց, որ  իրենց ընկերության և հարակից տարածքների բնակիչներն արդեն օրեր շարունակ պայքարում են իրենց իրավունքների համար, որոնց ամեն կերպ խոչընդոտում են Ամուլսարի հանքի ճանապարհը փակած ակտիվիստները։

«Այսօր մեր աշխատակիցները և հարակից տարածքի բնակիչները փակել են Դիլիջան տանող ճանապարհը, նրանք ակտիվիստներից պահանջում են դադարեցնել բողոքի ակցիաները, ակցիա իրականացնող ակտիվիստները խոչընդոտում են  մեր ընկերության ազատ  տնտեսական գործունեության իրավունքը, որն արդեն մի քանի օր է՝ ամբողջությամբ սահմանափակված է, իսկ ոստիկանությունը մատնված է անգործության, քանի որ չի իրականացնում գործողություններ՝ ակտիվիստներին տարածքից հեռացնելու համար։ Ես հերքում եմ տեղեկությունը, որ «Լիդիան Արմենիայի» աշխատակիցները շշերով հարվածել և վնասել են Դիլիջանի ճանապարհին կայանված զբոսաշրջիկների մեքենաներից մեկը»,- մեզ հետ զրույցում ասաց ընկերության իրավաբանը։ 

Վերջինիս խոսքով՝ ակտիվիստների գործողություններն, ըստ Քրեական օրենսգրքի երկու հոդվածների, որակվում են հանցագործություն, և, հետևաբար, ըստ նրա, ընկերության անունը հեղինակազրկող ցանկացած գործողություն կստանա համապատասխան իրավական գնահատական, քանի դեռ ոստիկանները չեն կանխում այդ հանցագործություններն ու խուլիգանությունները։ 

«Լիդիան Արմենիա» ընկերության աշխատակիցը նշեց, որ մինչ այս պահը բողոքի ակցիա իրականացնող ակտիվիստներն ուղղորդվում են որոշ ուժերի կողմից և պայքարը ոչ թե տնտեսական, այլ քաղաքական պայքար է․«Այս շարժման շահառուներն անհատներ են, և ես կոչ եմ անում իրավապահ մարմիններին բացահայտել շարժումն ուղղորդող անհատներին»։

Հիշեցնենք, որ ավելի վաղ մեզ հետ զրույցում «Լիդիան Արմենիայի» աշխատակիցների կողմից զբոսաշրջիկների մեքենային հարվածելու մասին ահազանգել էր ակտիվիստ, «Ջերմուկ զարգացման ծրագիր» հասարակական կազմակերպության համակարգող Նարեկ Միրզոյանը։