15.12.2025 | 16:25
Ովքեր կարող են մինչև 10,000 դրամ հետվճար ստանալ անկանխիկ առևտրից
«Լիդիան Արմենիայի» աշխատակիցները հարվածել են Ամուլսար տանող ճանապարհին կայանած մեքենաներին․ ակտիվիստ
29.06.2018 | 16:43
Ամուլսարի շուրջ կրքերը գնալով ավելի են թեժանում։ Այսօր բախումներ են տեղի ունեցել սար տանող ճանապարհը փակած բողոքի ակցիայի մասնակիցների և «Լիդիան Արմենիա» ընկերության աշխատակիցների միջև։
Factor.am-ի հետ զրույցում «Ջերմուկի զարգացման կենտրոն » ՀԿ համակարգող Նարեկ Միրզոյանը, ով ականատես է եղել բախումներին, պատմեց․ «Այսօր վաղ առավոտից «Լիդիան Արմենիա» ընկերության 20-ից ավելի աշխատակից փակել են Գորիս-Երևան միջպետական, ինչպես նաև՝ Ջերմուկ տանող մայրուղին և պահանջում են, որ Ամուլսարի հանքի ճանապարհը փակած բողոքի ակցիայի մասնակիցները բացեն ճանապարհը։ Ջերմուկի ճանապարհով զբոսաշրջիկների մեծ հոսք է երթևեկում և, փաստորեն, ընկերության աշխատակիցները թույլ չեն տալիս նրանց հասնել Երևան, ինչն էլ դարձավ բախումների պատճառ։ Ես ականատես եմ եղել՝ ինչպես էին «Լիդիան Արմենիա» ընկերության աշխատակիցները բռունցքներով, շշերով հարվածում տարածքով անցնող զբոսաշրջիկների մեքենաներին, որոնցից մեկի ապակին կոտրվել է, ճիշտ է ես այդ պահին այդտեղ չէի»։
Մեր զրուցակցի փոխանցմամբ՝ տարածքում հսկողություն իրականացնող ավելի քան 20 ոստիկան չեն փորձել կանխել երկու կողմերի միջև բախումը և վեճին միջամտել են միայն այն ժամանակ, երբ ընկերության աշխատակիցները սկսել են շշերով հարվածել ճանապարհին կանգնած մեքենաներին։
Հիշեցնենք, որ Ամուլսարի հանքի շահագործման դեմ պայքարող ակտիվիստներն արդե 9 օր է՝ նոր թափով սկսել են բողոքի ակցիաները և խոստանում են դրանք շարունակել այնքան ժամանակ, մինչև հանքը շահագործող ընկերությունը դադարեցնի իր գործունեությունը։
Կատարվածի շուրջ «Լիդիան Արմենիայի» տեսակետը կներկայացնենք ավելի ուշ։
