14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Դատարանը հրապարակել է Հնդկաստանի սահմանախախտ քաղաքացու դատավճիռը
Հասարակություն
03.04.2023 | 22:21
Շիրակի մարզի ընդհանուր իրավասության դատարանը՝ դատավոր Սաթենիկ Անդրեասյանի նախագահությամբ, արագացված վարույթով դատական ակտ է կայացրել հայ-վրացական սահմանն ապօրինի հատելու մեջ մեղադրվող Հնդկաստանի քաղաքացի Նարեշ Ջայի Կումարիի նկատմամբ նախաձեռնված քրեական վարույթով։ Վերջինս ընդունել է իր մեղքը։
Դատարանը որոշել է որպես պատիժ նշանակել նվազագույն աշխատավարձի տասներեքապատիկը, որը կազմում է 884 000 դրամ։ ՀՀ օրենսգրքի հոդված 469-ը՝ «Պետական սահմանն ապօրինի հատելը», որի 1-ին կետի հատկանիշներով նախաձեռնվել է քրեական վարույթ Հնդկաստանի քաղաքացի Նարեշ Ջայի Կումարիի նկատմամբ, սահմանում է հետևյալ պատիժը․ «Առանց սահմանված փաստաթղթի կամ պատշաճ թույլտվության Հայաստանի Հանրապետության պետական սահմանը հատելը՝ պատժվում է տուգանքով՝ տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ կարճաժամկետ ազատազրկմամբ` առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով»: Նարեշ Կումարի կալանքի ժամկետը կլրանա ապրիլի 8-ին։
Հիշեցնենք՝ Հնդկաստանի քաղաքացուն մեղադրանք է առաջադրվել այն բանի համար, որ «2022թ. Հոկտեմբերի 8-ին Վրաստանի Նինոծմինդայի տարածաշրջանի Սամեբա գյուղի տարածքից ապօրինի՝ առանց սահմանված փաստաթղթերի և պատշաճ թույլտվության միայնակ, հետիոտն հատել է վրաց-հայկական պետական սահմանը, մուտք գործել ՀՀ, և Շիրակի մարզում տեղակայված ՀՀ ԱԱԾ սահմանապահ զորքերի ուղեկալի ծառայողների կողմից բռնվել է հայ-վրացական պետական սահմանագծից 250 մետր հեռավորության վրա»:
Արմիկ Մովսիսյան
