14.09.2026 | 20:30
Ադրբեջանը սարքել է եվրոպացի դիվանագետների գլխին՝ մասնակից դարձնելով իր կազմակերպած շոուին․ Էդգար Առաքելյան. ՏԵՍԱՆՅՈՒԹ
Ֆրանսիայում բողոքի ցույցերը հերթական անգամ վերածվել են անկարգությունների, 200 ցուցարար է ձերբակալվել
Քաղաքականություն
29.03.2023 | 13:35
Ֆրանսիայում կենսաթոշակային բարեփոխումների դեմ բողոքի ցույցերի տասներորդ օրը՝ մարտի 28-ին, հարյուր հազարավոր մարդիկ կրկին դուրս են եկել փողոցներ։ Փարիզում և մի շարք այլ քաղաքներում փողոցային ակցիաները վերածվել են անկարգությունների։ Ֆրանսիայի ՆԳՆ տվյալներով՝ բախումների հետևանքով տուժել է 175 ոստիկան։ Իսկ Փարիզում առնվազն երկու ցուցարար է վիրավորվել , հայտնում է AFP լրատվական գործակալությունը։ Ոստիկանությունը բերման է ենթարկել շուրջ 200 ցուցարարի։
Ֆրանսիայի մայրաքաղաքում սև հագած ու ծածկած դեմքերով ցուցարարները հրկիզել են աղբամաններ և թալանել սուպերմարկետները, հայտնում է AFP-ն, ոստիկանությունն արցունքաբեր գազ է կիրառել։ Ֆրանսիայի հյուսիս-արևմուտքում գտնվող Լորիեն նավահանգստային քաղաքում ցուցարարները այրվող բարիկադներով փակել են երկաթուղային ուղիները: Վերամշակման գործարաններում և վառելիքի պահեստներում շարունակվող գործադուլների պատճառով երկրի գազալցակայանների մոտ 15%-ը ստիպված է եղել կրճատել առաջարկվող վառելիքի տեսականին, իսկ գազալցակայանների 7 %-ի վառելիքն ամբողջությամբ սպառվել է:
Մարտի 28-ին բողոքի ակցիաների պատճառով խափանումներ են եղել նաև Ֆրանսիայի մի շարք քաղաքներում հասարակական տրանսպորտի աշխատանքում։ Էյֆելյան աշտարակն ու Վերսալի պալատը փակ են եղել այցելուների համար։ DW-ն նկատում է, որ այս անգամ ցուցարարների թիվը նվազել է մեկ շաբաթ առաջվա համեմատ։
Տաթև Ֆռանգյան
