Բանակցողը պետք է փոխվի. Թագուհի Թովմասյանը՝ ռազմական էսկալացիայի վտանգի մասին․ ՏԵՍԱՆՅՈՒԹ

Բանակցություններին այլընտրանք չկա, հաջորդ ճանապարհը պատերազմն է: Այս մասին այսօր ԱԺ-ում լրագրողների հետ զրույցում նշեց ԱԺ «Պատիվ ունեմ» խմբակցության պատգամավոր Թագուհի Թովմասյանը:
«Բայց բանակցողը պետք է փոխվի, որովհետև արդեն 2 տարի է անցել պատերազմից, և բանակցողը մինչև հիմա չի հասկացել, որ ինչքան մենք զիջում ենք, այնքան Ադրբեջանի ախորժակը բացվում է․․․

Մենք նորից ստացանք նորից պատերազմ, ստացանք Սյունիքում ագրեսիա, հողեր վերցրեցին: Մենք ունեցանք զիջումներ տարբեր հատվածներում, նաև բանակցային դիրքերի զիջումներ, նաև Արցախի հարցում նշաձողի իջեցման պատրաստակամություն, նաև Պրահայում ադրբեջանամետ դիրքորոշման արտահայտում: Այս բոլոր զիջումները Նիկոլ Փաշինյանն է իրականացրել: Պետք էր ի սկզբանե հասկանալ՝ մեր թշնամին ով է, մի քիչ ուսումնասիրել, նոր գնալ բանակցությունների զրոյական կետից: Պետք է բանակցողը փոխվի, որ կարողանա Հայաստանի ազգային շահն առաջ տանել»,- ասաց պատգամավորը։

Անդրադառնալով Ստեփանակերտ-Բաքու երկխոսությանը՝ Թովմասյանը նշեց «Հայաստանի իշխանությունները Արցախի իշխանություններին միայնակ են թողել Բաքվի հետ, բայց արցախցիները իրենց հուսալի դաշնակից ու գործընկեր են համարում ՌԴ-ին և շարունակում են պնդել, որ ցանկացած բանակցություն պետք է տեղի ունենա ռուս խաղաղապահների ներկայությամբ: Հանդիպումը հենց այդ պատճառով է հետաձգվում է, որովհետև Ալիևի քաղաքականությունն այն է, որ ամեն կերպ դուրս թողնի ռուս խաղաղապահներին այդ բանակցություններից, որպեսզի Ադրբեջանը Արցախի հետ մնա միայնակ: Բայց արցախցիները չեն ցանկանում այդ հեռանկարը, դրա համար պնդում են, որ ռուս խաղաղապահների ներկայությամբ և նույն վայրում պետք է շարունակվեն բանակցությունները»:

Մանրամասները՝ տեսանյութում։