Եթե Մոսկվան փող ունի, թող կառուցի․ Անկարան ՌԴ-ից ներդրումներ է պահանջում գազային հանգույցի ստեղծման համար

Անկարային ռուսական ներդրումներ են պետք գազային հանգույցի ստեղծման համար։ Այս մասին ՌԻԱ Նովոստիին հայտարարել է Թուրքիայի նախագահին առընթեր անվտանգության և արտաքին քաղաքականության խորհրդի անդամ Չաղրի Էրհանը։

Ավելի վաղ Թուրքիայի էներգետիկայի և բնական պաշարների նախարար Ֆաթիհ Դյոնմեզը հայտարարել էր, որ գազային հանգույցի ստեղծման հարցով փետրվարի 14-15-ը տեղի է ունենալու միջազգային գագաթնաժողով, որը, սակայն, փետրվարի 6-ի ավերիչ երկրաշարժերից հետո հետաձգվել էր։

Նախագծի շուրջ ակտիվ բանակցությունները դադարեցվել են Թուրքիայի հարավ-արևելքում տեղի ունեցած ավերիչ երկրաշարժերից հետո: Մոտ ժամանակներս, ըստ ՌԻԱ Նովոստիի՝ բանակցություններին ծանոթ աղբյուրի, դրանք վերսկսվելու են։

«Հանգույցի շուրջ բանակցությունները դադարեցվել էին, քանի որ երկրաշարժից հետո շատ բան է փոխվել Թուրքիայում։ Բոլոր առաջնահերթությունները փոխվել են։ Սկզբունքորեն, այո՛, հանգույցը Թուրքիային ձեռնտու է, սակայն մենք հիմա գումար չունենք դրա համար։ Եթե ՌԴ-ն գումար ունի, խնդրեմ, սկսեք կառուցել հանգույցը։ Ամեն ինչ կախված է ներդրումներից»,- ասել է Էրհանը։

Հիշեցնենք, որ 2022 թվականի հոկտեմբերի 13-ին Աստանայում տեղի է ունեցել Թուրքիայի նախագահ Ռեջեփ Թայիփ Էրդողանի և ՌԴ նախագահ Վլադիմիր Պուտինի հանդիպումը, որի ընթացքում ռուսական կողմն Անկարային առաջարկել է գազային հանգույց ստեղծել Եվրոպա մատակարարումների համար։ Աստանայից վերադառնալիս էլ լրագրողների հետ զրույցում Էրդողանն ասել էր, որ Թուրքիայի Էներգետիկայի և բնական պաշարների նախարարությանը և ռուսական կողմից համապատասխան գերատեսչություններին հանձնարարվել է համատեղ քայլեր մշակել այդ ուղղությամբ։ Նա նաև ասել էր, որ Թրակիայի շրջանը կարող է դառնալ նոր գազային հանգույցի ստեղծման ամենահարմար վայրը։

Էմմա Չոբանյան