Արցախի, Ադրբեջանի ներկայացուցիչների և ՌԴ խաղաղապահ զորախմբի հրամանատարի միջև եռակողմ հանդիպում է տեղի ունեցել

Այսօր եռակողմ հանդիպում է տեղի ունեցել Արցախի, Ադրբեջանի ներկայացուցիչների և ՌԴ խաղաղապահ զորախմբի հրամանատարի միջև։ Այս մասին Factor.am-ի հետ զրույցում տեղեկացրեց Արայիկ Հարությունյանի խորհրդական, հատուկ հանձնարարությունների գծով ներկայացուցիչ Դավիթ Բաբայանը։

«Հանդիպման ընթացքում տեխնիկական և հումանիտար բնույթի հարցեր են քննարկվել։ Դրանց թվում է գազի և էլեկտրաէներգիայի անխափան աշխատանքի մասով կարևորագույն հարցը, Լաչինի միջանցքի մասով ևս քննարկումներ եղել են, բայց ձեռք բերված պայմանավորվածությունների մասով այս պահին մանրամասներ ներկայացնել չեմ կարող մինչև դրանց վերջնական հաստատումը»,- նշեց Բաբայանը։
Նշենք, որ սա այսպիսի ձևաչափով երկրորդ եռակող հանդիպումն է. նախորդը տեղի է ունեցել փետրվարի 24-ին։

Հիշեցնենք` դեկտեմբերի 12-ից Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ «բնապահպանական» պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Դեկտեմբերի 13-ից ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։

Ռոզա Վարդանյան