Ստյոպա Սաֆարյանն անդրադարձավ Սեդա Սաֆարյանի անվան շուրջ աղմուկին. այս մասով դատարան հայց կներկայացվի․ ՏԵՍԱՆՅՈՒԹ

ԽԱՊԿ-ը կազմակերպել է «Դատական գործեր ընդդեմ լրագրողների և լրատվամիջոցների․ խնդիրներ և միտումներ» թեմայով կլոր սեղան-քննարկում։

Նշենք, որ դիտարկված ժամանակահատվածում ընդդեմ ԶԼՄ-ների ու լրագրողների ներկայացվել է 106 դատական հայց, որոնցից 72-ը՝ 2021 թվականին, 34-ը՝ 2022-ին։ Այդ հայցերից վարույթ է ընդունվել 93-ը (2021-ին՝ 69, 2022-ին՝ 24), մնացած 13-ը վարույթ չեն ընդունվել փաստաթղթերը թերի լինելու կամ հայցը հետ վերցնելու հիմքերով։

«Խոսքի ազատության մի երեսն էլ պետք է լինի պատասխանատվությունը։ Կեղծ լուրերը տարիներ շարունակ հայտնվում են լրատվական կայքերում․․․ Այդպիսի որևէ նյութ չունի հեղինակ։ Կայքերում կարող է տեղադրվել հանրային անվտանգությունը վտանգող նյութերից սկսած՝ մինչև հասարակական, քաղաքական գործիչներին վիրավորող, զրպարտող տեղեկատվություն։ Եվ այդ դեպքում լուծում չկա։ Լրագրողական քիլլերությունը լրագրություն չէ»,- նշեց ՄԱՀՀԻ-ի ղեկավար  Ստյոպա Սաֆարյանը։

Սաֆարյանն անդրադարձավ նաև Սեդա Սաֆարյանի անվան շուրջ ստեղծված աղմուկին։ «Ժուռնալիստների միության նախագահի՝ 168.am լրատվական կայքում կա 3-4 հրապարակում, նաև ԱԺ Մարդու իրավունքների հանձնաժողովի նախագահ Թագուհի Թովմասյանի թերթում կան հրապարակումներ այն մասին, որ իբրև թե Սեդա Սաֆարյանը կատարել է կոպիտ խախտում։ Երկու օր առաջ իրենց փաստաբանն ասաց, որ դա ոչ միայն կոպիտ խախտում չէր, այլ նաև էական խախտում չէր, դրա համար չեն պնդում և այդ հիմքով ԱԺ չեն մտնում։

Բավարար հիմքեր կան Սեդա Սաֆարյանին զրպարտող այս հրապարակումների հիմքով մտնել դատարան։
Ինչպե՞ս անենք, որ գան դատարան ներողություն խնդրեն, այլապես ինչքա՞ն կարող է այսպիսի որակի լրատվություն լինել»,- նշեց ՄԱՀՀԻ-ի ղեկավարը։

Մանրամասները՝ տեսանյութում։