06.06.2026 | 14:11
Հայ շախմատիստների վերջնական արդյունքները կանանց ԵԱ-ում
ԱԱԾ-ում 2 անգամ ատեստացիա չանցած ծառայողին ուզում եք հանել, իսկ ՊՆ-ում՝ դե չանցավ՝ չանցավ, թող շարունակի ծառայությունը․ Գեղամ Մանուկյան․ ՏԵՍԱՆՅՈՒԹ
Քաղաքականություն
27.02.2023 | 13:50
ԱԺ պաշտպանության և անվտանգության հարցերի մշտական հանձնաժողովի նիստում քննարկվում է նախագիծ, որի ընդունման արդյունքում, բացառությամբ ԱԱԾ տնօրենի և նրա տեղակալների, բոլոր ծառայողները ատեստավորում կանցնեն։
«Հայաստան» խմբակցության պատգամավոր Գեղամ Մանուկյանը, դիմելով ԱԱԾ տնօրենի տեղակալ Տիգրան Հարությունյանին, հետաքրքրվեց, թե արդյո՞ք այս նախագիծը մշակելու ընթացքում հաշվի է առնվել կամ ուսումնասիրվել է Զինված ուժերում ներդրված պարտադիր ատեստավորման օրենսդրական փաթեթը։
«Իրավակարգավորումները սկզբունքային առումով բխում են նաև Պաշտպանության նախարարությունում կիրառված փորձի արդյունքներից, այսինքն՝ սկզբունքային դրույթները նույնական չեն, բայց նման են»,- պատասխանեց Հարությունյանը։
Ընդդիմադիր պատգամավորը հարցրեց, թե որքանո՞վ է արդար, որ ուժային մի համակարգում ատեստացիա չանցնելու դեպքում պաշտոնյան հեռացվում է, իսկ մյուս համակարգում՝ չի հեռացվում, շարունակում է ծառայությունը․ «ԱԱԾ-ում 2 անգամ ատեստացիա չանցած ծառայողին ուզում եք հանել, իսկ ՊՆ-ում՝ դե չանցավ՝ չանցավ»։
«Ես ինձ թույլ չեմ տա գնահատականներ տալ մեկ այլ համակարգում կիրառված փորձին և իրավակարգավորումներին, միայն կասեմ, որ մեր այս իրավակարգավորումները բխում են կոնկրետ վերլուծությունից»,- պատասխանեց ԱԱԾ տնօրենի տեղակալը։
Նշենք, որ ըստ առաջարկվող նախագծի, ԱԱԾ ծառայողների առաջին ատեստավորումն անցկացվելու է կամավորության սկզբունքով, այնուհետև այն կլինի պարտադիր` յուրաքանչյուր 3 տարին մեկ անգամ։ Ընդ որում` ատեստավորման բացասական արդյունքի դեպքում կրկին ատեստավորում անցնելու համար ծառայողը 1 տարվա ընթացքում 2 անգամ դիմելու հնարավորություն կունենա։ Ատեստավորում չանցած ծառայողները կզրկվեն հավելավճարից և կազատվեն զբաղեցրած պաշտոններից ու կանցնեն կադրերի ռեզերվ մինչև 2 ամիս ժամկետով: Այդ ընթացքում նրանց կառաջարկվի նախկինում զբաղեցրած պաշտոնից մեկ աստիճան ցածր խմբի պաշտոն։ Նոր նշանակմանը չհամաձայնելու դեպքում կադրերի տրամադրության տակ գտնվելու սահմանված ժամկետը լրանալուց հետո ծառայողը կարձակվի ծառայությունից:
Մանրամասները՝ տեսանյութում։
