09.10.2026 | 15:20
Պուտինին ծննդյան օրվա առթիվ հրապարակային շնորհավորել են առնվազն 15 երկրների առաջնորդներ, այդ թվում՝ Փաշինյանն ու Ալիևը
Փետրվարին Թուրքիայում ավելի քան 7000 ցնցում է գրանցվել
Քաղաքականություն
22.02.2023 | 21:01
Թուրքիայում փետրվարի 6-ի հզոր երկրաշարժերից հետո ավելի քան 7 հազար ցնցում է գրանցվել։ Նման տվյալներ է տրամադրել Թուրքիայի Արտակարգ իրավիճակների կառավարման ազգային գործակալությունը, գրում է Euronews-ը։
Ավելի քան հարյուր հազար տուն ավերվել է կամ գտնվում է անմխիթար վիճակում։ Վնասված շենքերից մի քանիսն էլ փլուզվել են երկուշաբթի օրը թուրք-սիրիական սահմանին 6,4 մագնիտուդ ուժգնությամբ տեղի ունեցած հերթական երկրաշարժի հետևանքով։
Միևնույն ժամանակ ի հայտ են գալիս երկրաշարժերի տնտեսական հետևանքների առաջին գնահատականները։ Թուրքական արտադրության և բիզնեսի համադաշնությունն ակնկալում է, որ տուժած տարածքների վերականգնման համար կպահանջվի ավելի քան 80 միլիարդ դոլար: JPMorgan-ը միայն բնակարանների շինարարություն և ենթակառուցվածքների վերանորոգումը 32 միլիարդ դոլար է գնահատում:
Միայն Թուրքիայում բնական աղետի զոհերի պաշտոնական թիվը գերազանցում է 42 հազարը։ Սիրիայում ևս մի քանի հազար մահվան դեպք է հաստատվել։
Թուրքիայի նախագահ Ռեջեփ Թայիփ Էրդողանի ներկայացրած տվյալների համաձայն՝ տուժած շրջանների վրանային քաղաքներում տեղավորված է մոտ 865 հազար մարդ։ Կառավարությունը հայտարարել է վերակառուցման զանգվածային ծրագրի մասին՝ մինչև տարեվերջ հնարավորինս շատ մարդկանց բնակարաններով ապահովելու համար։
Միջազգային լրատվական գործակալությունները նշում են, որ վրանային քաղաքների շատ բնակիչներ վախենում են տեղափոխվել բնակելի շենքեր՝ նոր երկրաշարժերի սպառնալիքի պատճառով։
Տաթև Ֆռանգյան
